Дагъусттаннал Росгвардиялул управлениялул пресс-къуллугърал хъунама, полициялул полковник Константин Шиян гьуртту хьунни Щалагу Аьрасатнавусса «Юнармия» тIисса суккушиндарал региондалул штабрал батIаврий.
Шикку гьурттушинна дунни ДР-лул Жагьилтурал министерствалул ва МахIачкъалаллал КIулшивуртту дулаврил управлениялул вакилтурал. Ларгсса шинал клубрал дурмунил хIасиллугу дурну, уттиния тихуннай дулланмур ххал диргьунни. КIицI лавгунни Управлениялул ва жяматийсса организациялул хIала-гьурттушиврул масъала. Константин Шияннул бувсунни ларгсса шинал чIаваармейцынащал архIал цала хъунисса мероприятияртту ва патриот акциярду дуршиву.
— Управлениялул каялувчитурал хъуннасса къулагъас дуллалиссар школарттай, колледжирттаву дуклакисса оьрчIах, цанчирча ва оьрмулувусса оьрчIру бигьану чил биялдарайн лагайссар, бигьану бяйкьин бюхъайссар. Жува хIарачат бан аьркинссар вайнная унгу-унгусса патриотътал хьун бан,- увкунни хIаписарнал. Ванал оьвкунни заседаниялий гьуртту хъанахъисса цинявннайн 27-мур мартрай Росгвардиялул кьинилун хасну хьунтIисса шадлугърайн.
Региондалул отделениялул хъунама Марат РахIимовлул барчаллагь увкунни Росгвардиялул зузалтрахь хIала-гьурттуну дуллалисса даврихлу.
