Пресс-конференциялий Аьрасатнал Президентнахьхьун буллалисса суаллу, гьай-гьай, хъинну чIявусса бия. КIицI лаглай буру язи бувгьусса цаппара суаллу ва миннухьхьунсса жавабру.

«Дагестан» РГВК-лул журналистнал В. Путиннухьхьун буллунни Дагъусттаннай 2 уссу-хIухчу литIаврил хIакъиравусса суал.
Мунихьхьун жаваб дуллай, В. Путиннул бакIрайн лавсунни му масъала тапшур буван Аьрасатнал силистталул комитетрал хъунама А. Бастрыкиннуйн.

В. Путиннухьхьун буллунни Керчиннал проливрай хьусса къалмакъалданул хIакъиравусса суал. Аьрасатнал Президентнал бусаврийну, му бивкIссар Украиннал властирдал чулуха­сса питна, Порошенкол рейтинг гьаз дансса. Украиннал аьра­личалт Аьрасатнал дазучIан тIайла бувккун бивкIссар, ми микку литIунссар тIисса пик­рилий, Заннайн щукру, цучIав къаивкIунни.

Украиннал журналистнал В. Путиннухьхьун буллунни Донбассрал ва Украиннал дянивсса аралул хIакъиравусса суал. Аьрасатнал Донбассрал халкьуннан ихIсандалул кумаг буллалиссар, ттиния тинмайгу буллантIиссар, кунни Президентнал.

Репертурал концерт дукьан даврил хIакъиравусса суалданухьхьун жаваб дуллай, кунни: Микку цукунчIавсса ххуй-хъиншиву дакъар, цанчирча репертурал балайрдаву наркотикру машгьур буллай бур – му тIурча, нация лиян буван­сса ххуллур.
В. Путиннухьхьун буллунни цIинцI-ччюрклил бакIурдал хIакъиравусса суал. Жавабран ванал увкунни: «Аьрасатнаву тачIав цIинцI, лув дагьмур, личIи-личIину салкьи дайсса къадиркIссар, амма мукун дуллан аьркинссар. Закондалий бакъа бувсса цIинцIал бакIурду бухлаган буван аьркинссар. Гьашину ми бакIурду сававну чIярусса къалмакъаллу хьунни.
Суал буллунни США-нал ­аьрал Сириянава буккан баврил хIакъираву. Декабрьданул 19-нний Дональд Трамплул баян бувну бур ИГИЛ дух хьушиву ва мунияту американал аьраллу Сириянавату буккан буллалишиву. Мунил хIакъираву В. Путиннул увкунни: «Аьраллу буккан баву – тIайласса хIукмур, тикку американал аьрал бацIан баву легитиннайсса къахъанахъи­ссар. «Исламрал паччахIлугъ» дух хьуссар. Аьмну ласурча, Аьрасат рязину бур Сириянавусса США-нащалсса хIала-гьурттушиврий.

Бензин ххира шаврил хIа­къиравусса суалданухьхьун жаваб дуллай, В. Путиннул бувсунни му суал хIасул хьуну бушиву Франциянавусса къарши буккавурттацIун бавхIуну. Мунал тIимунийну, Аьрасатнал ХIукумат хъинну личIлулну дарцIуну дуссар ччуччиялух­сса багьрал ялув (ми хъарну бур навтлил котировкарттайн). Мунияту Франциянаву куннасса тагьар жучIара къахьунтIиссар. Аьрасатнал агьалинаща шай­ссар цивппа мунийн къаршину бушиву баян буван, амма так закондалул лагрулий.

Пресс-конференциялий Аьра­сатнал Президентна­хьхьун буллунни пенсиярттал реформалул хIакъиравусса суалгу. Мунихьхьун жавабран ванал увкунни: «На мудана къаршину ивкIссара пенсиярттайн бу­ккаврил шинну лахъ даврийн. Амма ялу-ялун захIмат хъанай бия. Къазузими гьарза хъанай, зузими чан хъанахъисса тагьар хьуну дур.

Дуснакьирттаву жаза буллалаврил хIакъиравусса суалданухьхьун В. Путиннул укунсса жаваб дуллунни: «Дуснакьир­ттавусса инсантурай жаза буллалаву – къатIайлассар, ми ишир­ттал хьхьичIалу кьукьин аьркин­ссар, му закондалийн къаршисса буну тIий. Амма система даххана дуван къааьркинссарча, му ххуй-хъин дуванни аьркинсса».
Трамплущалсса хьунабакьаврил хIакъиравусса суалдану­хьхьун В. Путиннул укунсса жаваб дуллунни: «Хьунабакьаву хьунсса, ягу къахьун­сса ттун къакIулли. На ттинингу чIявуссалийла учав, жу хIадурссару хьунабакьин куну. Жул бур цачIу ххал бигьинсса масъалартту: Сирияналгу, Ух­ссавнил Кореяналгу хIакъираву, мукунма жулва кIивагу билаятрал дянивсса арардал хIакъиравугу».

ХIадур бувссар
ХI. Аьдиловлул