Уттигъанну МахIачкъалалий, Дагъусттаннал паччахIлугърал педуниверситетраву, хьунни Гьарун Саэдовлул цIанийсса Дагъусттаннал регионал жяматийсса организациялул батIаву. Му хас дурну дия ларгсса шинал дурсса ва гьашинусса шинал дуван дакIнийсса давурттан. БатIаву дачин дурну ия му ккурандалул председатель Давди Увайсов.

Бадрижамал Аьлиева
Гьашину ва ккурандалун там хъанай дур 10 шин. Ва цифра цуппа хъунмасса бакъанугу, фондрал оьрму хIисаврай, диялну итталун дагьансса юбилей хъанай дур. Вай шиннардий организациялул дурсса давурттугу чансса дакъар. ЦIанасса бигьа бакъасса заманнай, гьарцаманан цалассавагу буван жапа хъанахъисса чIумал, шяраваллил жяматрал, миллатрал ма­съалартту щаллу бансса хIарачат буллай зузими къачIявусса бур. ДакI дарцIуну учин, уку-укунсса ккураннал шяраваллил жямат цал ххишала цачIун буллали­ссар, цуксса хIайпнугу, укунсса ккуранну щурущисса шяраваллил цIарду чIярусса дакъар.
Ва кьини хьусса агьамми ихтилатругу бия щаллу буван бювхъусса масъаларттацIун ва ччясса чIумул мутталий дуван дакIнийсса давурттацIун бавхIусса. Миннувасса ца яла хьхьичIунмину хIисав хъанай дур Гьарун Саэдовлул цIаницIун дархIусса давурттугу. Гьашину миллатрал язисса арснан хъанай дур 122 шин. Гьарун увсса кьини, майрай, Гъумук Хъун бярничIа тIитIин най бур цIу дуккан дур­сса гьайкал, райондалул жяматгу, дуклаки оьрчIругу гьурттуну, рес­публикалул хъуншагьрулия­сса хъамаллурайнгу оьвкуну.
ЦIумур гьайкалданул щаллушин дурну дур ЦIахъардал Къуманивумур Гьарун Саэдовлул гьайкалданул автор Бадвани Чарандаевлул.
Ккурандалул ччясса чIумуй дуван нанисса давурттавасса ца дур Интнил хьхьугу. Ваччиял жяматрал гьарца шинал, Каспийс­калий, банкетру бай залданувун бавтIун, дувайссар Интнил байран. Ва кьинисса даккаврий ххал бивгьунни му байрандалийн хIадур шаврицIун бавхIусса ца­ппарасса кIанттурдугу.
Кьинилул повесткалийн лавсъсса масъаларттавасса ца бия Ваччиял жяматрал справочник щаллу баву. Справочник куну, ва анжагъ шяраваллил инсантурал адресирттал ва телефоннал лу бакъарча, чIалачIисса куццуй, ва бур шяраваллил тухумру чивчусса, миннуясса агьамсса затру салкьи бувсса лу. Ванийн бучIир Ваччиял шяраваллил чIиви-хъунсса энциклопедия учингума.
Ва кьини мукунма гьаз бунни бивкIу хьусса къатлуву мукьцIал баврил ягу къабаврил масъалагу, цIанасса захIматсса чIунгу хIисавравун ларсун, му къачан­сса харж буклакисса даву душиврий чIурчIавгу дуллай. Укунсса ихтилатру махъсса шиннардий чIа-чIаннин сукку хъанай бур, ва шяраваллил бакъа, цайми шяраваллал жяматирттавугу.
Ихтилатру ялагу хьунни махъа нанисса жагьилтал цIана, нажагь бакъа, бивкIурдайн-буккурдайн занай бакъашиврул, ми кувннащал кув кIул хъанай бакъашиврул хIакъиравусса, гъан-маччамигума кувннан кув ккаклай бакъашивриясса, Интнил хьхьунил ва цайми-цаймигу батIавурттайн шай­ссаксса чIявуну мюрщи-хъунигу бувцуну занан аьркиншивриясса, жагьилтал кувннан кув ккакланшиврул, лакрал дянив буллали­сса маша-ташурду гьарза буваншиврул, гьантта бувккуну кувнная кув арх бувцун нанаву, цалва мархри хъамабитлатаву хъунна къахъананшиврул.