Октябрьданул 4-нний Оьруснал театрданул чIивимур залдануву хьунни халкьуннал творчествалул ва аслийсса культуралул аралувусса ДР-лул ХIукуматрал «Душа Дагестана» премия дуллалисса шадлугърайсса батIаву.

Бадрижамал Аьлиева
Шадлугъ тIитIлай, ДР-лул культуралул министр Зарема Буттаевал увкунни:
ХIакьину, мяйжаннугу, респуб­ликалул ва федерал къуллугъир­ттал лагрулий хъуннасса къулагъас дуллай бур Аьрасатнал халкьуннал аслийсса культура дуруччаврих. Зунма кIулсса куццуй, щалла респуб­ликалий щаллу бувссар ва буллай буссар Аьрасатнал халкьуннал аслийсса культуралул центрду, цалгу хъуннасса даву дуллалисса халкьуннал искусство хьхьичIуннай дуван, фольклор дуруччин, му давривун студентътал ва дуклаки оьрчIругу хIала буллай. Центрдал базалий тIивтIуну буссар миллатрал костюмру дуруххаврил къатри, халкьуннал художествалул промыслирдал студияртту. ХIакьинугу хьунни ца ххаллилсса иш – тIитIарду А. Тахо-Годил цIанийсса тарихрал ва художествалул цачIун був музей, бакьин бувну махъ, цIусса тарихийсса къатраву, — увкунни Зарема Ажуевнал.
КIицI ларгунни личIи-личIисса шиннардий «Душа Дагестана» премиялун лайкь хьуну бивкIминнал цIарду, дакIнийн увтунни миллат­рал культуралуву ликъаххайсса куртIсса аьш кьадиртсса Къачу ХIаммадовгу.
Гьашину «Душа Дагестана» премиялун лайкь хьуми барчагу бувну, чIа увкунни гихунмайгу тIайлабацIу. Премия ларсминнавух бия фольклорданул ансамбльлал каялувчитал, хореографтал, музыкантътал, балайчитал, халкьуннал театрдал режиссертал, халкьуннал канил пишардал ус­ттартал.
«Народный танец» номинациялуву «Душа Дагестана» премия дуллунни Лакрал райондалул Культуралул управлениялул начальник Лида Кьурбанован, цила оьрму культуралун хас бувсса, халкьуннал культура дуруччавриву хъунмасса захIмат буллалисса, махъа нанисса никиравугу халкьуннал творчествалухсса ччаву дихьлай. «Народный мастер» номинациялуву премиярттан лайкь хьунни ЦIуссалакрал райондалиясса Рамазан Аминов ва Республикалул Халкьуннал творчествалул къатлуву цикссагу шиннардий зузисса АьбдулхIамид ХIамидов (Ххутрал шяравасса).
Гьашину ва премиялийн кка­ккан бувну бивкIссар республикалул 20 райондалиясса ва 4 шагьрулиясса 40-нная ливчусса инсантал. Миннава хасъсса комиссиялул 15 лауреат 8 номинациялуву язи увгьу­ссар сентябрьданул 19-нний хьу­сса батIаврий. Комиссия сакин хьуну бур 11 инсанная: Аьли Аьлиев, Юрий Ханжов, Хан Баширов, Тарият Къапиева, Калимат Эльдарова, Мисрихан Маммаев, Заира Кильдеева, ХIабиб ХIажиев, Абусупиян Аьликъараев, Аскерхан Аскерханов, комиссиялул председатель – ДР-лул культуралул министр Зарема Буттаева.
Премияртту, бахшишру дуллуну махъ, республикалул шагьрурдаясса ва районнаясса творчествалул коллективирттал ккаккан дунни концерт. Мунивух гьур­тту хьунни Лакрал райондалиясса «Гъази-Гъумучи» ансамбльгу. Жагьилтурал ккаккан дунни лакрал халкьуннал къавтIаву «Къиссу». Шиккува кIицI лаган, цайми коллективру бухьурча паччахIлугърал харжлугърай, ва Лида Кьурбановал цила хIарачатрацIух багу-бавтIун, зузи бувсса ансамбльли, Гъумучиял искусствалул школалул выпускникталгу лагма лаган бувну щаллу бувсса жагьилсса коллективри. ЦIанасса кризисрал ппурттуву, лагмара «сокращенияртту», «урезанияртту» чан къахъана­хъисса, думур ссуссукьу дуллали­сса чIумал ва хъинну аьркинсса давур Лида Мусаевнал дуллали­сса. Жагьилтал, дук­лаки оьрчIру миллатрал культура, фольклор ххирану тарбия, вардиш буллалира тIий, паччахIлугърал чулуха ялу-ялун аслисса культуралух­сса ургъил лавай хъанахъисса чIунгу дунавхьур, умуд бур хIукуматрал чулухагу, лакрал культура ххираминнал чулухагу чIарав бацIаву хьун­ссар тIисса.
ДакIнийн бутан, «Душа Дагес­тана» премия дуллалиссар 2012 шиная шиннай, 2015 шиная шиннай Республикалул БакIчи Рамазан АьбдуллатIиповлул хIукмулийн бувну ва хъанахъиссар хIукуматрал наградану.
Премиялущалгу барча буллай, чIа тIий буру цIу-цIусса ххувшавуртту.