Сентябрьданул 20-нний Дагъусттаннал БакIчи Рамазан АьбдуллатIипов Москавлив хьунаавкьунни «Газпром» ПАО-рал правлениялул председатель Алексей Миллердущал.

Ихтилат хьунни республикалул зунттал районнайн газ буцаврил хIакъираву хьюмусса газ ябансса къатригу дурну.
Мукунма ххал бивгьунни Да­гъусттаннал муштаритурал ччув­ччусса газрахсса бурж шаврицIун бавхIусса масъала. Тикку бувсъсса куццуй, республикалий хIарачат буллай бур предприятиярттай ва коммунал комплексрай ччувччу­сса газрахлу хьусса бурж чан буван. Дагъусттаннал ХIукуматрай сакин бувсса межведомственная коми­ссиялул му бутIуву буллай бур муданмасса мониторинг, хIарачат буллай бур лавай кIицI бувсса предприятиярттал буржру бухлаган буван.
Амма, цуксса хIарачат булларчагу, аьмну му тагьар даххана дуван хъинну захIмат хъанай бур. Проб­лема щаллу баву мурадрай Рамазан АьбдуллатIиповлул гьаз бувну укунсса масъала: республикалий сакин бан тIайланна «Газпром межрегионгаз» ООО-рал каялувшиврулусса организация, мунил цилла щаллу дулланшиврул газ булаврил ва газрахлусса арцу датIаврил давуртту. Алексей Миллер рязи хьуну ур му сипталущал ва тапшур бувну бур му масъалалуха зун.
Хьунабакьаврий гьуртту хьуминнал бувсъсса куццуй, ДР-лул ХIукуматрал ва «Газпром» ПАО-рал дянивсса кьутIилийн бувну хъуннасса даву дуллай бур зун­ттал районнайн газ буцаврин хасну. 2005-2015 шиннардий Газпромрал инвестициярдал лагру хьуну дур 8,2 млрд. къурушру.
2012-2015 шиннардий Дагъус­ттаннай газрал щаллу баврил программалий ккаккан бувну бивкIссар 125 объект, миннувату 85 объектрай давуртту къуртал дурну дур. Ми бур поселокирттал дянивсса газопроводру Ахттиял, Докъузпариннал, Хасавюртуллал, УнцIукIуллал, Бущихъиял ва ЦIумадиял районнай.
2016-2020 шиннардил программалувун багьну бур газификациялул объектру ЦIумадиял, Ххунзахъиял, Къизлардал, Гумбетуллал ва Казбекуллал районнай. ДР-лул бакIрайн лавсун бур шикку газрал сетьру дишин.
ХIадур бувссар
ХI. Аьдиловлул