Сентябрьданул 15-нний МахIачкъалалив Дагъусттаннал па­ччахIлугърал филармониялул гъинтнилмур майданнив миллатирттал цашиврул кьинилул байрандалун хасъсса шадлугъ хьунни. Шиккун бувкIун бия биялсса агьали ва республикалул шагьрурдал, районнал каялувчитал, Тамашачитуравух мукуна ия республикалул БакIчи Рамазан АьбдуллатIипов.

Байрандалул дайдихьулий ва агьамсса кьинилущал дагъусттанлувтал барча бан сахIналийн увккуна ДР-лул ХIукуматрал председатель Аьвдуссамад ХIамидов.
«ХIурмат бусса дагъусттанлувтал, ххирасса дустал!
Республикалул БакIчиналгу, ХIукуматралгу, ттулагу чулуха Мажлисралгу, ва ттула чулухагу дакIнийхтуну барча буллай ура зу Дагъусттаннал цашиврул кьинилущал-утти махъсса шанна шинал дянив кIицI лаглаги­сса, жула цинявннал дакIурдиву дусшиврул, дакьаврил, цаннал ца бугьаврил, жула циняв миллатру хъинсса чIаххул бушиврул яла чаннами ва ххуйми асарду чантI чин буллалисса цIусса байрандалущал. Мяйжаннугу, ва байрандалул гьану бивзун буссар вай ххазинардай. Гьар шинах ва байран укунсса даражалий кIицI лаган хIукмугу хьу­ссар Дагъусттан миллатирттал шамилчин­сса съездрай. Цанчирча Дагъус­ттаннал миллатирттал лавгмургу, хIакьину хъанахъимургу, ялун бучIантIимургу цанницIун ца бавхIуну буну тIий. Махъ бакъа, жува пахрулий буссару жула тарихрая, жула ппухълунная, тайннал жула цIаний бивхьу­сса захIматрая, дугъришиврия, къириятрая.
ЧIярусса ттуршукурдай Да­гъусттаннал миллатру гуж-гужсса чапхунчитурал хьхьичI зунтту хьуну бацIайсса бивкIссар.
Гьарцагу дагъусттанлувнан кIулссар тарихравасса 1741 шинал сентябрьданул 15-нний Надир-шагьнал аьрал ххит бу­ккан бувсса жула миллатирттал чувшивурттая. Му тарихрал иширал цал ялагу тасттикь був­ссар жува ца кулпат бушиву, ца канийсса ххювагу кIисса бушиву. Жула дусшивур жула аваданшивугу. ЛичIи-личIисса ишру хъанай бивкIссар жула аьрщарай. Аьрасатнавун Дагъусттан бувххун махъ гьануцIакул ба­ххана хьуссар жула халкьуннал багьу-бизу, оьрмурду. Миккугу кутIасса чIумул мутталий Да­гъусттаннал гужсса хъит увку­ссар маэшатрал, кIулшивуртту дулаврил, цIуллу-сагъшиву дуруччаврил арардаву.
Щархъаву буллай байбивхьуссар школарду, азарханарду, клубру ва цаймигу социал идарартту. Хъунмасса барчаллагьрай буссару жува жула уссу­шиврийсса оьруснал миллат­рал интеллигенциялун,-увкунни ХIукуматрал председательнал. Мукунма бувсунни ванал хIакьину республикалул оьр­мулуву хъанахъисса дахханашивурттая ва ттигу хьунтIисса ккаккиярттая.
Хъирив тамашачитуран сахI­налий цала гьунарду ккаккан бувунни театрдал, балетрал, къавтIавурттал коллективир­ттал. Миннул дя-дяних классикалул ва эстрадалул балайрду увкунни Дагъусттаннал артистуралгу. Тамашачитурал хъинну ххуйну, гурну хъатру ришлай, кьамул бувунни оьрчIал ансамбльлал кка­ккан бувсса гьунарду. Байрандалул ахирданийгу шадлугърал фейерверкру лехлахи дурунни ссавруннайх.