Августрал 30-нний ЦIуссалакрал райондалийсса ххуллурдал тагьар ххал дигьин райондалийн бивунни хIукуматрал делегация: Дагъусттаннал Ххуллурдал хозяйствалул агентствалул хъунама Загьид Ххучбаров, Дагъусттаннал БакIчинал госслужбалул,  кадрардал ва госнаградалсса буллалисса управлениялул хъунама Артур Исрапилов ва цаймигу хIукуматрал вакилтал.

П. Рамазанова
Райондалул бакIчи МахIа­ммад-ХIажи Айдиевлущал, мунал хъиривчу Султан ХIам­затовлущал, Халкьуннал Мажлисрал депутат Зайнуллагь Мирзоевлущал, «Новолакское дорожно-эксплуатационное предприятие № 28» ОАО-лул хъунама Оьмар Жалаловлущал ва архитектуралул ва строительствалул управлениялул хъунама ЦIаххий Базановлущал вайннал цал «Ярыксу» неххай­сса ЦIуссаккулувсса ламу ххал бувна. Загьид Ххучбаровлул кIицI лавгуна ламу ххуй­сса тагьарданий бушиву, муххал конструкциярду цIакьну духьукун, ттигу тамансса шиннардий цIакьну бацIантIишиву, так ялун чIалачIисса диц-куц сантирайн дуцин багьлай бушиву, ламул киямур чулгу цIакь бувну. Муния махъ хIукуматрал делегациялул ххал бувна ДучIиннал шяравусса шагьраххуллу ва «Ямансу» неххайхсса ламу. Миккусса шагьраххуллугу ххуйсса тагьарданий бушиву, ламумур чара бакъа цIу буккан буван багьлай бушиву кIицI лавгуна. Загьид Ххучбаровлул Оьмар Жалаловлуйн тапшур бувна цIусса ламу буван­сса смета дуван. Циняв объектру ххал диргьуну мукьах райондалул хъунаманал кабинетраву совещание дурна, шикку Загьид Ххучбаровлул ххуйсса кьимат бивщуна ЦIуссалакрал ДЭП-лун ва мунил хъунама Оьмар Жалаловлун барчаллагь баян бувна райондалийсса ххуллурдал тагьар ххуйсса даражалий душаврихлу.