Сентябрь зурул 1-нний, КIулшивурттал кьини, ЦIуссалакрал райондалий­сса ЦIуссаккуллал шяраваллил оьрчIан ххаллил­сса бахшишну хьунни АхIмад-Хан Султаннул цIа дирзсса школалул цIусса корпус тIитIаву.

И. Саидова
Школа тIитIлатIисса мажлисрай гьуртту хьунни ДР-лул миллатирттал политикалул министр Татьяна Гамалей, ДР-лул БакIчинал администрациялул ПаччахIлугърал кадрардал ва паччахIлугърал наградарттал масъаларттаха зузисса управлениялул хъунама Артур Исрапилов, «Новострой» ГУП-рал хъунама МахIаммадсани Мяндиев, геологиялул ххалбигьавуртту дуллалисса центрданул каялувчи Рамазан Багатаев, ЦIуссалакрал райондалия лак цIуминалийн бизан буллалисса масъаларттаха зузисса ДР-лул ХIукуматрал управлениялул вакил, школалул учительтал, дуклаки оьрчIру ва миннал нину-ппу.
Школалул цIуну бувсса корпус тIитIлатIисса мажлис байбивхьунни ЦIуссалакрал райондалул бакIчи ХIажи Айдиевлул. Райондалул бакIчинал дуклаки оьрчIру цIусса дуккаврил шинащал барча буллалисса ихтилат бунни. Цала ихтилатраву мунал кIицI лавгунни республикалул каялувчитурал кIулшивуртту дулаврил чулухуннай дуллали­сса хъуннасса къулагъасрайну ва захIматсса чIумал ттизаманнул тIалавшиннардай бувсса ва цIу-цIусса оборудованиярттал щаллу бувсса школалул корпус буван бювхъушиву.
— Жува аьркинссару чIярусса шиннардий салкьи хьуну диркIсса ххаллилсса аьдатру ядуллан. ЦIуссаккуллал школалий мудангу дуручлайнма буссар школалул тарихравун дагьсса аьдат-эбадатру. Шикку дуклай бивкIссар дунияллийх машгьур хьусса чIявусса жула ватанлувтал ва школалий дарсру дихьлай бивкIссар ххаллилсса педагогтал. ТачIав хъамакъабитай шикку зий бивкIсса, школалул цIа-кьини бюхттул дуллай, хъунмасса захIмат бувсса каялувчитал: Бутта Рамазанович, Илияс Кьурбанович.
На хъинну ххарину ура хIа­кьину ва школалийн 100-нния ливчусса оьрчIру цалчинмур классравун най буну тIий. Ва буниялагу ххари хьунсса ишри. ЧIа тIий ура школалийн нанисса оьрчIан тIайлабацIуртту, чаннасса бучIантIимур, хьуннав вайнная цинявннан пахру-ххаралунсса ххалилсса оьрчIру, — куна цала ихтилатраву Артур Исрапиловлул. Мунал цала чулуха школалун пишкаш дуруна интерактив ула.
Татьяна Гамалейл увкунни: «На вихшалдарай бура ЦIуссаккуллал шяравусса школа дуклаки оьрчIал оьрмулуву хъинчулиннайсса дахханашивуртту ва куртIсса кIулшивуртту дуллалисса центрну хьунссар», — куну.
Министрнал кIицI лавгунни, ДР-лул БакIчи Рамазан АьбдуллатIиповлул ва ХIукумат­рал кIулшивуртту дулаврил масъалартту цала аякьалулун ласаврийну, махъсса 3 шинал мутталий республикалий цикссагу школартту ва детсадру бувшиву.
— ДакIнийхтуну чIа тIий бура вай шикку дуллалисса агьамсса давурттив сававну оьрчIан ду­ккаврихсса гъира-шавкь ххишала шаву ва кIулшивурттал даража гьаз шаву, — увкунни министр­нал.
Татьяна Гамалейл ДР-лул ХIукуматрал бакIчинал чулуха школалул директор Татьяна Айгуновайн тапшур бунни телевизор ва школалул библиотекалунсса луттирду.
Ихтилатру бувну махъ цинявппа хъамаллурал ххал бунни школалул цIусса корпус.
Школалий бур информатикалул, физикалул, биологиялул, чил билаятирттал ва оьрус мазурдил, химиялул, ОБЖ-лул, захIматрал, музыкалул, ИЗО-рал дарсру дишайсса ххаллилсса кабинетру. Му бакъассагу, бур шивува мушакъатсса оьрчIансса хасъсса классругу. Цимурцаннул лащу-щаллу бувну бур спортзал, актовый зал, библиотека, медициналул ва дукиялул блокру, логопеднал ва психологнал кабинетру.
ЦIуну бувсса корпусраву бур 140 дуклаки оьрчIансса кIану.
ЦIуссаккуллал шяравусса школа гьарта-гьарза баву мурад­рай тIивтIусса цIусса корпус буниялагу агьамсса даву хьунни. ЦIуминалийсса щархъаву яла гьарзану оьрчIру заназисса школа бия ва. Шиккун оьрчIру дарсирдайн занай буссия 3 сменалий. Утти дуклаки оьрчIангу, миннал нитти-буттангу, учительтурангу хъуннасса дигьалагру хьунни. Ва школалийн цинявппа оьрчIру занантIиссар ца сменалий.
Школалий каялувшиву дуллай бур зун гъира-шавкь ду­сса, оьрчIал кIулшивуртту дулаврил даража лавай баву мурадрай цикссагу давурттив дуллалисса директор Татьяна Айгунова. Ванил цила чулуха барчаллагь увкунни ва бигьа бакъасса масъала дузрайн бу­ккан буван кабавкьусса, чIарав бавцIусса Республикалул БакIчи Рамазан АьбдуллатIиповлухь, ЦIуссалакрал райондалул бакI­чи ХIажи Айдиевлухь, «Новострой» ГУП-рал хъунама Ма­хIаммадсани Мандиевлухь.