КIулшивурттал кьини – 1-мур сентябрьданий студентътурал хьхьичI нузру тIиртIунни республикалул вузирдалгу. Жулва шагьрурдал кIичIиртту цIунилгу чIюлу бунни гьарца кьини дарсирдайн ва дарсирдая нанисса жагьилтурал.
Цалчин школалийн наниминнаяр агьамшиврул чулуха къаяларайсса кьини дур 1-мур сентябрьданул кьини, школагу къуртал бувну, цалчинма-цалчин вузирдавун наниминнангу.

Бадрижамал Аьлиева
Дагъусттаннал вузирдаву ца яла хьхьичIавамунин ккалли­сса ДГУ-рал бухкIуллийх ва кьини цалчин­сса шаттирду лавсунни сайки 3 азара абитуриентнал – цIуну хьусса студентнал. Миннавутугу сайки 250 студент кьамул унни филологиялул факультетрайн – шаннагу отделениелийн (оьрус мазрал, оьрус мазрал ва дагъусттаннал мазурдил, журналистикалул).
Филологиялул факультетрал студентътурал, мукунма ДГУ-рал М. ХIажиевлул цIанийсса кIи­чIиравусса вава корпусравусса кьатIаллил билаятирттал факультетрай дуклакиминналгу, цIусса ду­ккаврил шин ва кьини дайдирхьунни цIуну дирхьу­сса нузардия (кьатIату буххайми) ва ремонт дурну, бакьин бувну, букъавчIайсса куццуй баххана хьусса жанахIрая. Вай дакъасса, ялагу цIу бувну бия кIивагу факультетрал 1-ми зивурдая 2-миннуйн лахъайсса чурттурдугу.
Ремонт дурсса жанахIравун бавтIун, яла чIюлу бувсса цIусса чурттурдайх лавай актовый залданувун (цувгу дукIу-кIулссану, ремонт дурну, бакьин бувсса) бавтIунни филологиялул факультетрал 1-мур курсирал студентътал ва миннал нину-ппу. ЦIуну хьусса студентътуращал ва кьини хьунабавкьунни факультетрал бакI дургьуми.
СахIналийн студентътурал ва миннал нитти-буттал хьхьичIун бувккунни филологиялул факультетрал декан Мазанаев Шяъван ва ва факультетрай бусса 8-гу кафедралул каялувчитал.
Филологиялул элму язи дургьуну бувкIминнахь ча бувкругу куну, ректоратрал ва факультетрал чулуха студентътал цIусса дуккаврил шинащалгу барча бувну, Шяъван Аьбдулкьадировичлул бувсунни факультетрал тарихрая, факультетралгу, аьмну гьашину 85 шинал юбилей кIицI лагантIисса Дагъусттаннал паччахIлугърал университетралгу циксса ххаллилсса пишакартал итабавкьуссарив, бувсунни факультетрал выпускниктурая хьушиву лавайсса къуллугъчитал, ми зий бушиву республикалий, билаятрай ва чил хIукуматирттай, кIицI ларгунни факультетрал выпускниктуравухсса чIявучин кIулсса цIарду, миннавух Дагъусттаннал кIия президентналссагу – МухIу Аьлиев ва МахIаммадаьли МахIаммадов, мукунна ДР-лул миллатрал политикалул цIанасса министр Татьяна Гамалейл цIагу (уттигъаннунин цикссагу шиннардий ва факультетрайгу зий бивкIсса). Бувсунни гьашину цими абитуриент кьамул увссарив факультетрайн. Гьашину кьамул був­сса абитуриентътурал аьдад (250 инсан) хIисав дурну, филологиялул факультет багьлай бур хьхьичIминнал, лидертурал сияхIравун. Магистратуралувун кьамул увну ур 50 инсан, миннавух къачансса бур муниннинмур кIулшиву цайми вузирдаву ласръссагу. Бувсунни факультетрал цимирагу шинал лахъишиврий цIакь хьусса язисса аьдатру душиву, мукунна душиву цинявннаннагу аьмсса законну, кьараллу, миннуя ти-шинмай хъанан­сса ихтияргу щихьчIав дакъашиву, мукунминнащалсса ххуллугу кьянкьасса бикIантIишиву. Бувсунни факультет тIивтIуния шинмай зий бушиву оьрус мазрал ва литературалул, Дагъусттаннал миллатирттал мазурдил, мукунма журналистикалул арардаву зун­сса пишакартал хIадур буллай.
— КуртIсса гьарта-гьарзасса кIулшиву ласун, элмулуха зун ччиминнал чIарав бацIан цалла даву ххишала дакъа ххуйну кIулсса, цалва оьрму ва пишалун хас бувсса педагогтурая сакин хьусса коллектив мудангу хIадурну буссар, дуклан ччи­сса студентътурансса шартIругу щаллуну дуссар, бур ххаллилсса учебно-материальная база, цувгу сакин хьусса личIи-личIисса структурардая, — увкунни деканнал.
Дуккаврия ливчуну махъсса чIун харж дангу бувсунни ччарча спортрахун, ччарча къавтIавурттахун, балайрдахун, жяматийсса иширттахун, ччимунихун багьансса шартIру щаллу дурну душиву.
ЦIанасса гьарцагу чулуха­сса нигьачIишиву дусса заманагу хIисавравун лавсун, оьвчаву дунни жагьилтурайн мугъаятну бикIан, ххуйну къакIулсса инсантурайн вихшала къадихьлан. Бувсунни студентътурал ва преподавательтурал мюхчаншиву дуру­ччаву мурадрай, дуван дакIнийсса давурттая.
Ахирданий студентътурал деканнахьхьун буллунни цаппара­сса суаллугу.
Хъирив цала-цала отделениярттайх, аудиториярттавух бавчIусса жагьилтуран буллунни студент билетру.