Вай гьантрай жучIа редакциялий буссия ГьунчIукьатIрал шяраватусса, Азирбижаннаву, Бакуй, яхъанахъисса ТIагьирдул душ ПатIимат Штанчаева. Гьунар бусса шаэр, сий дусса хъамитайпа, личIи-личIисса наградарттан лайкь хьусса хIакин. Буттал кIанттуя ябувцун, чил кIанттай яхъанансса кьадар нясив бувсса ПатIиматлул сайки щала творчествамур буттахъал билаятран хас дурсса дур.
Ванил мукъурттийсса балайрду учай тамансса лакрал балайчитурал. 2022 шинал итабавкьунни шеърирдал цалчинсса лу «Оьрмулул лахIзарду».
«ГьунчIукьатIрал назмурду» тIисса луттиравугу сайки дачIи назмурдал автор ва бур. Хизри Илиясовлул сакин бувсса «Лакку чIурду» шеърирдал луттиравусса тамансса назмурдал авторгу ва бур.
Цуппа гъурбатрай яхъанай бунугу, цилла тарихийсса мина-гьанулух цIакьсса ва куртIсса ччаву дусса инсаннал дакIнива къалагайсса буруккин ванивугу бур. Ванищалли хIакьинусса ихтилатгу.
– ПатIимат, цал вила творчествалул ххуллия, литературалувусса дайдихьулия буси. Та байбивхьуссара ина назмурду чичлай? Вил цалчинма насихIатчи цур?
– На шеърирду школалий дуклакисса чIумалва чичайссия. Амма буттан цукуннив кьамулну бакъая на шеърирду чичлай бушиву. Ппухълуннал мукъул хIурмат жучIава лахъну бикIайхха, мунияту личIину чичрулул давриву хьхьичIунмай хьун къавхьуна таний. ТачIав личIину сивсуссагу къабивкIра, буттан хас къабизаву гьа хьухьунссия.
– Ппу цувагу творчествалия, литературалия архсса ухьунссия.
– Ппу мукъул пасихIсса икIайва, мандолина бищайва. Жул никирал оьрчIан ххирар буттал хаварду. ЦIанихсса усттар ия цувагу, тIаннул ва пюрундалул ларзурду дувайсса. Нину колхозраву зузисса инсан бия.
– Цалчинсса шеъри дакIний бурив?
– ДакIний бур. Буттарссил ласнал ттун чIи пишкаш бувна. «Ккуза» цIагу дирзун, хIурмат буллай, хъунма буссия. Ттул Ккуза бивххуна, хъинну бювххуна. Ттувурасса къумашиву шеърилуву къявхъ учин дурссия. Му ппурттуву на 2-3 классраву дуклай буссияв. Цалчинма насихIатчину на ккалли увавияв ттула учитель, ххаллилсса чичу Абакар Мудунов. Лакку мазрал грамматика ва литература ххуйну лахьхьин дувайва. КIулшиву тIалав дуллалисса икIайва. Бакуя бувкIтари, мудан лагайссияв.
ГьунчIукьатIув 8 классгу къуртал бувну, на яла дуклан бувхссара Каспийскалийсса Медучилищалувун. Ва къуртал байхту, ГьунчIукьатIув ФАП-рай акушеркану зий буссияв. Яла на кьадарданул Саратовуллал областьрайн, Пугачёв тIисса шагьрулийн бувцунав. ЦIуну тIиртIусса медициналул санчасть дия. Тикку кIира шин дував му санчастьрал хъунмурну. Тичча Бакуйн лавгссара, аьралийчунан щар хьуну. Бакуй оьрчIансса поликлиникалул медсестрану зий бивкIссара цал. Яла –хъаннил консультациялий. Тикку зий бунува, медициналул институтгу къуртал бувну, зун бивкIра заллу усса клиникалий гинекологну.
– Классиктурал ва хъунмур никирал чичултралми луттирду лакку мазрал авадансса бур, мийн-тийн бакъа. Вин цуми луттирду дакIний ливчIри, цуми буккин ччива цIунил?
– Абакар Мудуновлул, Юсуп Ххаппалаевлул луттирду. Ттул столдания хIура къавхьуссар МахIаммад-Загьид Аминовлул ва Мирза МахIаммадовлул луттирду. «Дусшиву» журналллу буссар хьхьичIава итабавкьусса, вайгу цIуницIа ккалан бикIара. Лакрал литература буниялттунгу авадансса дур, гьарцагу чичул цалва ххуллу-хха бур.
– Вил хъунмур оьрму Бакуй лавгун бур. Ина чичайнуккар азирбижан мазрайгу. Цумур мазрай чичлан бигьану бикIай?
– 44 шинни Бакуй. Гьай-гьай. Лакку мазрай чичин бигьану бикIай: цаппарасса назмурду дуссар азирбижаннал мазрай чирчуссагу. «Чичулт» тIисса журналданий бивщуну буссар.
– Цуми темарду гъанни вин? Ссая чичлан ччан бикIай яла-яла?
– Ватандалуха, ниттиха, ччавриха. Ттулва дакIнивун бувхсса, хъинчулий дакIний ливчIсса, аьпалухьхьун лавгсса инсантурахагу чичлан ччан бикIай.
– Интернетрал бияла хъунмасса ва заманнай канил бугьайми луттирду аьркинну чIалай бурив винма?
– Луттирду мудангу аьркинссар, миннул бияла личIиссар. Интернетраву аьркин бакъамургу бур. Луттирдал буккултрал мазгу авадан булллалиссар, нягу зузи дуллалиссар.
– Бартлавгун ччисса творчествалул даву?
– ЦIусса назмурдал лу итабакьинсса. Гихунмайгу бур пикрирду.
– ПатIимат, вин хъинну ххирар буттал шяравалу, ччя-ччяни бучIара Дагъусттаннайнгу. Шийнмай бизан кIункIу тIий бакъарав?
– Бура, амма бизан къахьунтIишивугу бувчIлай бура. ОьрчIру Бакуй цалва-цалва къатрай бур. Вайннал ххуйсса давуртту дур, адвокатну зий ур Бакуйма арс. Душ тIурча, нава кунма гинекологнал пиша язи бувгьуну, хирург-гинекологну зий бур. На мяйжаннугу ччя-ччяни бучIара Дагъусттаннайн. Дуссия чIунну, хъатIуйн бувкIун, махъунмай лагайсса. Дагъусттангу хIура къашайссар дакIнивату. Хъунама арс Дагъусттаннай ур. Ттула оьрчIавугу буттал шяраваллихсса ччаву дишаврия рязийну бикIара. Вайннангу кIулссар лакку маз. Лакку мазрай гъалгъа бансса мюхтажшинна яла къалагай. Журналистка СалихIат Аьлиевая тIайла хьуну, лакку мазрай гъалгъа буван гъирашиврул батIайссару Бакуй цачIун. «Илчилул» редакциялийгу на мудангу ттунма гъансса инсантурал тIювайн багьсса кунма бикIара. Ва базилухь «Дараччи» фондрал душвавращал экскурсиялий буккансса сантгу дагьунни, вайннунгу барчаллагьрай бура. Ххари шара лакрал оьрмулуву хьусса ккаккиярттая ва хьхьичIуннайшивурттая. Зунгу ххуймуния, ххари банмуния ххишалану чичлан нясив баннав!
– ЦIуллу баннав, ПатIимат! Вил Ватандалийнсса ва махъунмайсса аьрххигу мудан ххарисса, тIайлабацIусса шаваннав! Жул редакциялия ва лакрая ссалам буси Бакуйннал лакрахьгу.
Ихтилат бувссар
ПатIимат Рамазановал
