Вай гьантрай Дагъусттаннал ХIукуматрал председатель МахIаммад Рамазанов хьунаавкьунни «Росатом Возобновляемая энергия» АО-лул гендиректор Григорий Назаровлущал.
Премьер-министрнал компаниялул каялувчитурахь барчаллагь увкунни ЦIуссалакрал райондалийсса ВЭС-рал (мурчай электростанциялул) проект мюнпат буну ва ккаккиялунну дузрайн дуккан даврихлу.
2025 шинал декабрь зуруй цалчинмур этапрай ВЭС-рал буллалисса электроэнергия Дагъусттаннал энергосистемалувун бачин бувссар.
– Гьашинусса шиналсса пландалуву буссар ВЭС-рал даву сантирайн руртуну зузи даву. Мурчай электростанциялул проект республикалул «ХьхьичIунсса проектирдал» сияхIравун ларсун дуссар. Республикалул маэшатраву ва ца яла хъунмур проектну хъанахъиссар. ХIакьину республикалий инвестициялул лагрулул чулухагу ва ца яла хъунмур проектну хъанай дур. Мурчай электростанциялул проект дузрайн дуккан даврийну Дагъусттаннай биял къахъанахъисса электроэнергия дузал баврин кумаг баву бакъассагу, республикалул бюджетравун нанисса инвестициярттугу ххишала хъанахъиссар, – увкунни МахIаммад Рамазановлул.
Проект дузрайн дуккан дантIиссар кIира этапрай. ВЭС-рай дишин ккаккан дурну дур 120 установка. Цалчинмур этапрай зузи дурну дур 152,5 МВт бусса 61 установка, кIилчинмур этапрай зузи дан най дур 59 установка. Шинай электростанциялул буллантIиссар 879 млн кВт/ч электроэнергиялул. ВЭС-рал гуж бур 300 МВт.
Григорий Назаровлул бусаврийн бувну, хIакьинусса кьини проектрал кIирагу этапрай дишин ккаккан дурну диркIсса 120 установкалува, дирхьуну дур 111 установка, хIадур бувну бур лирчIсса 9 установка дишинсса гьану.
ВЭС-рал кIилчинмур бутIувун дагьайсса давуртту къуртал дантIиссар ва му щурущи бантIиссар 2026 шинал ахирданийннин.
Шиккува кIицI лаган, ЦIуссалакрал райондалийсса ВЭС-рал проект дузрайн дуккан даву мурадрай, «Росатом» госкорпорациялущал региондалийсса компаниярттащалгу хIала-гьурттуну зий бур. ВЭС-рачIансса ххуллурдал строительствартту дуллай бур «Дорсервис 09» ООО ва установкартту дихьлахьисса площадкартту хIадур буллай бур «Мостоотряд – 99» АО.
МахIаммад Рамазановлул кIицI лавгунни, Дагъусттаннал ХIукуматрал ВЭС-рал даву электросетирдавух хIала духхан даврин ка-кумаг бан хIадурну бушиву.
Имара Саидова
