Ххувшаврил байрандалул хьхьичI кьини СунбатIуллал шяраву, СВО-лий чувшиврий жанну дуллусса ряха виричунал цIарду чирчусса мармарчарил ултти тIитIлатIисса мероприятие дунни.

Вайнна вирттаврал цIарду: Руслан Юсупов, Шамил Расулов, Нуруллагь Оьмаров, Абас ХIамзаев, Хизри Хизриев ва Руслан Оьмаров.
«Вай мармарчарил улттуй цIарду чирчусса вирттал абадшиврувун лавгмири. Вайннал жард къакуну биттур бувссар Ватан ххирасса аьралийтурал буржру, кьянкьану бавцIуну чувшиву ккаккан дурссар. Укунминнал аьпа абад буллан жулвагу буржри. Ялун нанисса никирангу вайннал гьунардая хавар бикIаншиврул. Жува жула ппухълуннал чувшиврия пахрулий бусса кунма, вайнналми чувшивриягу ялун бучIантIими пахрулий бикIаншиврул», – увкунни Ккуллал райондалул хъунама Ажуб ХIусмановлул.
Мармарчарил улттая пардав дукьангу тапшур бунни Ажуб ХIусмановлуйн ва меценат Артур Амуттиновлуйн. Шиккува кIицI лаганна, шяраваллил вирттаврал цIарду чирчусса ултти Артур Амуттиновлул цала харжирацIух дурсса даву душиву.

«Виричушиврий жанну дуллусса вай чиваркI цIанасса чIумул ялун личин бувсса виртталли. Гьарица чIумул ялун личин байссар укунсса вирттал. Ватандалул мурадру буручлай жанну дуллусса вай жула дакIурдивагу къабуккантIиссар», – увкунни Артур Амуттиновлул. Авгъанисттаннайсса иширттал гьурттучи, Ухссавнил Ккавкказнавусса терроризмалийн къаршийсса операциярттаву гьуртту хьусса, къуллугъ кьабивтсса полковник Аьбдуллаев Айвенгол, СВО-лул гьурттучи Рамазанов Нураттиннул ва шяравучу Аьлилов ЦIаххуйл барчаллагь кунни вирттаврал аьпа абад буллалисса даврил сиптачитурахь ва улттигу дурну, шяравун диянгу дурсса Артур Амуттиновлухь.
Вирттаврал мачча-гъаннал цIанияту ва митинграйн бавтIцириннал цIанияту барчаллагь тIисса ихтилат бунни Давдиева Камилатлул.
СунбатIуллал школалул дуклаки оьрчIал бувккунни патриот тема аьч дуллалисса шеърирду. Вирттаврал суратру дусса чIирацI дирхьунни тIутIив.

ПатIимат Рамазанова