Буттал кIанттул цIанийсса Хъун дяъвилий Ххувшаву ларсун 81 шин шаврил байран бюхттулсса даражалий кIицI ларгунни ЦIуссалакрал райондалий. Ва кьини райондалул шяраваллавусса Хъун дяъвилул гьурттучитурал гьайкаллацI дирхьунни тIутIив, хьунни «БивкIу бакъа полкрал» суратирттащалсса маршру, шяраваллал культуралул къатлул зузалтрал, школардал дуклаки оьрчIал хIадур дурсса тяхъашивуртту.

Ватан дуручлай жанну кьурван дурсса вирттаврал аьпа учин бувкIун бия ЦIуссалакрал райондалул бакIчи МаматIи ХIамзатов, ДР-лул Халкьуннал Мажлисрал законодательствалул, закондалул, паччахIлугъ дузал шаврил, КIанттул цила каялувшиврул ва регламентрал комитетрал председатель Артур Исрапилов, ванал кумагчи Зайнуллагь Мирзоев, ЦIуссалакрал райондалул Мажлисрал депутат Аслодин Аслудинов, райондалул шяраваллал бакIчитал, хасъсса аьралий операциялул гьурттучитал, юнармейцы, учительтал, дуклаки оьрчIру ва жямат.
Байрандалийн бувкIминнахь дия Хъун дяъвилийн лавгсса ттаттахъал суратру. Дуклаки оьрчIру ва мюрщулт бия аьралий яннардаву. ЦIуссалакрал райондалий мудангу Ххувшаврил байран дайдишай Гьамиящиял шяравусса Совет Союзрал Виричу Ханпаша Нурадиловлул гьайкалдануцI тIутIив дишаврийну. Гьашинугу, «БивкIу бакъа полкрал» акция дайдишин хьхьичI МаматIи ХIамзатов бакIчисса делегация лавгунни Гьамиящиял шяравун Виричунал гьаттацI тIутIив дишин.
Шикку митинг тIитIлай, жямат ва бусравсса хъамал барча буллалисса ихтилат бунни МаматIи ХIамзатовлул.
– Циксса шинну гьарчагу, та дяъвилул къюву лагь къархьунни. ХIакьину жува барчаллагьрай буру ва ник ришлай буру дяъвилул цIараву ливтIуминнал, ятIа-тIар бакъа бакъахьуминнал ва жуятува лавгсса цинявппагу ветерантурал, къинттуллух захIмат буллай бивкIминнал хьхьичI. Вайннал гьунарду ва къучагъну бувтсса оьрму абадлий дакIний личIантIиссар. Хъун дяъвилий чувшиврул ва патриотизмалул эбратну хьуссар чIавасса оьрмулий къучагъшиву ккаккан дурсса Совет Союзрал Виричу Ханпаша Нурадилов ва цаймигу вирттал. ХIакьинугу хасъсса аьралий операциялий Ватандалул мурадру бартбигьлагьисса къучагътурал чувшивурттайну тарбия дуллан аьркинссар ялун нанисса ник, – увкунни МаматIи ХIамзатовлул.
Байрандалун хас дурсса мероприятиярттал лагрулий, хьунни «Аьпалул багъ» тIисса Украиннал аьрщарай нанисса хасъсса аьралий операциялий чувшиврий жанну дуллуминнал аьпа­лунсса республикалул акция. «Аьпалул багъраву» тIиртIусса, аьралийтурал цIарду абад дуллалисса гьайкалдануцI тIутIивгу дирхьуну, дунни вирттал дакIнин бичлачисса ва миннал гьунарду кIицI лаглагисса митинг. Укунсса акциярттал ххишаланугу уттара дуккан дуллай дур вирттаврал цIарду, аьч дуллай дур жула тарихрал къучагъсса лажинну.
Байрандалул яла яргмур бутIану хьунни 700-нния ливчусса инсантал гьуртту хьусса «БивкIу бакъа полкрал» марш. Укунсса мероприятиярттай райондалул жяматрал чялишну гьурттушинна даврийну исват хьунни Вирттаврал дурсса чувшиврутту кьиматрай душиву.
Хъирив, цинявппа бувкIунни Буттал кIанттул цIанийсса Хъун дяъвилия зана къавхьуминнан ва 1999 шиналсса дяъвилул иширттаву жанну дуллуминнан дирхьусса гьайкаллацI тIутIив дишин.
Ххувшаврил байрандалул кьини МаматIи ХIамзатов бакIчисса делегация бивунни хасъсса аьралий операциялий жанну дуллусса аьра­лийтурал ниттихъачIан ва кулпатирттачIан. ЦIухху-бусу бунни цукунсса масъаларттащал хьунабакьлай буссарив хIакьину вай кулпатру ва кIицI лавгунни, тIалавшиннардал хIакъиравусса кумаг бан хIадурну бушиву.
– Хъунмасса барчаллагь учин ччай ура Ватандалул ххуллий чувшиврий жанну дуллусса къучагъсса арсру тарбия бувсса ниттихъахь. Зул арсурваврал, ласурваврал жанну дуллуссар Ватандалул мурадру, мюхчаншиву ва цашиву дуручлай, ялун нанисса никиран паракьатсса оьрму дузал буллай. Жун мудангу дакIний дикIантIиссар вайннал чувшиву. ТачIав хъамакъабитантIиссар жула аьрщи душманная дуручлай, жанну кьурван дурсса жагьилтал. Вайри жула ялун нанисса никиран эбратрансса патриотътал, – увкунни Артур Исрапиловалул.

Имара Саидова