КIундив

ЧIявусса халкьгу гьурттуну, лавайсса даражалий хьунни КIундиннал шяраву Ххувшаврил 81 шинан хас дурсса батIаву.
Ваний гьуртту хьунни шяравува ялапар хъанахъиссагу, республикалул ва Аьрасатнал цайми регионная бувкIссагу кIундими. Вайннавух бия Каспийск шагьрулул ЧС-рал отделданул хъунама, цалчинмур ранграл капитан Геннадий Кьурбанов, Александр Невскийл батальондалул доброволец, байкертурал «Ночные Волки» группалул член, 2014-ку шиналсса «Крымскаллал интнил» гьурттучи, СВО-рал гьурттучи Андрей Ажуев ва цаймигу. Вайнналгу бунни ва кьини дуклаки оьрчIал ва жяматрал хьхьичI асар хьунсса ихтилатру, гьуртту хьунни Буттал кIанттул цIанийсса Хъунмасса дяъвилийн лавгминнан дацIан дурсса гьайкалдануцI тIутIив дишавривух.
Андрейл дуклаки оьрчIан пишкаш бунни Сталинградуллал фронтраясса аьралий каска ва Александр Невскийл кьюкьлул ттугъ. Шиккува кIицI лаган, Андрейл ппу ХIасан Ажуев кIундиричуври, нину – оьрус миллатрал хъамитайпа. Андрей, чIявуну къаучIарчангу, ук-тук учIайссар буттал шяравун. Амма буттал шяравунсса ванал махъва-махъсса аьрххилия шиннай къачансса шинну ларгун дур. ДукIу ванащал ххуйну кIул хьуссар СВО-райн гуманитар кумагращал лавгсса кIундиричув Низами Умаров. Ванал оьвкунур 9-мур майрал шадлугъирттай гьуртту хьун Андрей Лаккуйн увкIсса. Шяравух, ванил зума-къирагърайхгу увккун, шяраваллил инсантуращал яхши-хашгу бувну, КIундиннал дянивмур даражалул школалул дуклаки оьрчIащал хьунагуавкьуну, хъиривмур кьини Гъумуксса парадрай гьурттугу хьуну, хъинну рязину лавгунни Андрей шярава цува мина дирхьу­сса ­Волгоградрайн.

Шушияв

Гьарца шинал кунма, гьашинугу Бюхттулсса Ххувшаврил кьини цала буттахъал, буттал буттахъал мина диркIний, вайннал рухIру дуний хьунадакьин кьанийсса Шушияту зунттавун, Лаккуйн, цалла шяравалу диркIсса кIанайн гъанчунащал ва дустуращал бувкIунни Юнус Жалиевгу, Ибрагьим Буттаевгу.
ДакIнин бутан, зунттаву лахъну (КIундиннал шяравух лавай лавгун) диркIсса Шушиннал шяравалу лакрал цайми щархъавух дизан дурссар ЦIуссалакрал райондалийн. Шяравалу диркIсса кIанай ливчIун бур чIиртту ва чартту.
Шикку 2010-ку шинал Новостройрай ялапар хъанахъи­са шушиннал, Юнус Жалиев бакIчину, дацIан дурссар Хъун дяъвилийн лавгминнал ва шярава кьанив бивзминнал аьпалунсса гьайкал.
Гьарца шинал майрал 9-сса кьини ва гьайкалданучIан батIавугу цIакь хьусса аьдатри.
ДукIу, Бюхттулсса Ххувшаврил юбилейрал шинал, Юнуслулгу, ванал арснал ХIажиналгу, Ибрагьимлулгу, Саэд Оьмаровлулгу цIу дуккан дурссар кIа гьайкал.
ГьайкалданучIасса митинграй ихтилатру бунни Шушиннал жяматрал хьхьичIунсса вакилтуралгу, мудан вайннал чIарав бусса чIаххуврайсса КIундинналмур жяматрал вакилтуралгу.

Бадрижамал Аьлиева