Каспийскалив дайдирхьуну, МахIачкъалалив дайлиртIунни халкьуннал творчествалул «Каспий – берега дружбы» фестиваль.

Ва тIитIлатIисса хъуннасса хоровод хьунни Каспийск шагьрулул хъунмур майданнив. Ванивух гьуртту хъанай бия Азирбижаннавасса, Къазахъисттаннаясса, Къалмукьнавасса, Ухссавнил АьсатIин-Аланиянавасса, Къабардин-Балкьарнавасса, Чачаннавасса, Ставрополлал крайраясса, Астраханнал областьраясса ва жулла республикалул муниципалитетирттаясса творчествалул коллективру.

Фестивальданул гьантрай кIивагу шагьрулий чIярусса шадлугъру хьунни, музыкалулми, балай-къавтIавуртталми дакъассагу, сурат дишаврицIунгу, халкьуннал усттартурал каруннил дурмуницIунгу, мастер-классирттацIунгу дархIусса.

МахIачкъалалив хьуми шадлугъирттавух ца агьаммурну дия С. Стальскийл бульварданий тIиртIусса «Аьрасатнал Вирттал» цIанилусса выставка, шикку дирхьуну дия жулла республикалул 19 Виричувнал суратру.

Р. ХIамзатовлул цIанийсса Национальный библиотекалул конференц-залдануву хьунни «Каспий – берега дружбы и единство народов России в международном культурном диалоге» цIанилусса ккуркки стол. Ванил давривух гьуртту хьунни маданиятрал ва магьирлугърал ишккаккулт.
Фестивальданул ахирну хьунни патриот программардал «Мы вместе – Россия!» тIисса концерт-акция.

Дунияллул халкьуннал дянивсса «Каспий – берега дружбы» фестиваль сакин дурссар «Культурное достояние» Центрданул, Аьрасатнал Культуралул министерствалул чIарав бацIаврийну, Дагъусттаннал Культуралул министерствалул, Республикалул Халкьуннал творчествалул къатлул, МахIачкъала, Каспийск шагьрурдал администрациярттал ва Культуралул управлениярттал гьурттушиннарайну.

Бадрижамал Аьлиева