Майрал байрандалул кьини Мариян Илиясовал цIанийсса «Дараччи» фондрал каялувчи Гульшан Хасаева цила кумагчи Тарият Къапиеващал бивунни Лакрал райондалийн ихIсандалул ххуллийсса мурад биттур бан, ттигъанну тIабиаьтрал апатIрайну зараллу бивминнанccа кумагращал.
«Жул даврил агьаммур мурад агьалинах аякьа давур. ТIабиаьтрал апатI хьусса жула аьзизсса райондалун кумаг аьркинсса чIумал хаснува, – увкунни Гульшан Хасаевал. – Жу барчаллагьрай буру цашиврул акция дансса сипта хъин чулий ккарккун чIарав бавцIусса фондрал гьарцагу вакилнайн».
Фондрал каялувчинал кIицI лавгунни кьини дуркни куннал чIарав кув бацIаву дагъусттанлувтурал оьттувура тартсса хасият душиву. Буттал буттахъая шиннай захIматсса иширттаву жула халкь цачIун хьуну, ккаккан дайсса диркIшиву чумартшиву ва цашиву.
Лакрал райондалул бакIчи Зураб Куччаевлул ихIсандалул ххуллийсса сипталул агьамшивугу кIицI ларгун, барчаллагь увкунни Гульшан Хасаевахь ва фондрал вакилтурахь.
«Ватанлувтурал чулухасса кумаг ва аякьа асар хъанахъийни агьалинал дакIругу захIматшиврува дуккантIишиврийнсса вихшалдарал дуцIлай дур», – увкунни ванал.
Хьунабакьаврий ихтилат хьунни фондрал ва райондалул администрациялул дянивсса уртакьшиврия. МаслихIат ккавккунни цачIу сакин дуллан лакрал халкьуннал аьдатру ва магьирлугъ ядаврил ххуллийсса давуртту.
Зулайхат Тахакьаева
