ЦIуссалакрал райондалий хасъсса аьралий операциялий жанну дуллуминнан хасну бувгьусса Аьпалул багъраву хьунни субботник.
Райондалул бакIчинал тапшур бувну, давуртту цукун най дурив ххал дуллай ия ванал хъиривчу Султан ХIамзатов. Ванал лахъсса кьимат бивщунни дурсса даврин ва кIицI лавгунни жула вирттаврал хIурматран Аьпалул багъ мудангу лайкьсса тагьарданий битан аьркиншиву.
Субботникрай чялишсса гьурттушинна дунни Жилищно-коммунальный хозяйствалул зузалтрал ванил хъунама Аьбдурашид Буттаев бакIчину. Субботникрайн бувкминнал уртту дурцун, мурхьирдал ттарцIру кIяла дурну, гьайкал, скамейкарду ва беседка шювшуну, ччюрк дартIун хъуннасса даву дунни. Ва агьамшиву, ляличIисса мяъна дусса кIанттул лагма лаган бунни инсантал. Укунсса акциярдал ххишалану асар хьун буллай бур инсаннал оьрмулул кьимат ва цал ялагу исват дуллай дур аьралий бурж биттур буллай жанну дуллуминнал чувшиву.
Андриана Аьбдуллаева
