Майрал 2-нний МахIачкъалалив, «Сенем» тIисса банкетру бай залдануву, лавайсса даражалий хьунни Мисиду Исяевал ихIсандалул концерт. Концертрай хьусса арцу гьан дуллалиссар хасъсса аьралий операциялийминнан кумагран. Цила зумуну усттарну дачин дурну бия концерт Дагъусттаннал халкьуннал артистка Саният Рамазанова. Коцертрайн бувкIсса тамашачитуравух бия Ума Аскерханова бакIчисса Юсуповалийсса (Хуршилова) аьралуннан кумаг буллалисса штабрал вакилталгу.
Ума Аскерхановал барчаллагь увкунни аьралуннан кумаг буллалисса, циняв ихIсандалул акциярттаву гьуртту хьун хIарачат буллалисса Мисидухь ва дуллунни ванин Грамота. Ванил бувсунни Мисидун хъунмасса, 3 азара инсан усса Донецкаллал полкрал чулухагу Барчаллагьрал чагъар хIадур бувну бушиву, му цуппа тихун лагайхту ласунтIишиву.
Мисиду, мяйжаннугу, чIярусса ихIсандалул давурттавух гьурттусса инсан бур. Ми давурттаягу бавну, мукунма соцсетирдаву ва гъараллал зарал биян бувсса бугьарасса, цIуллу-сагъшиврул мушакъатшиву дусса хъамитайпалун кумаг буллайгу ккавккун, концерт хьуннинма хьунабавкьуссияв на Мисидущал.
КIул хьунни, щин ялтту ларгун, захIматсса тагьардануву ливчIсса Рабият Илиясова ЧIарттал шяравасса бушиву. Ва Мисидун Дянивмур Азиянаву ялапар хъанахъисса шиннардийва кIулну бивкIун бур. Туркманисттаннал Мары тIисса шагьрулий хъунмасса ттучан бусса Мисиду тийх чIявуссаннан, хаснува лакран, ххуйну кIулну бивкIун бур. Укун дакIнин бутлай бур ва: «Ттул чIаххуврай ялапар хъанахъисса лакку инсаннан поездрай бакIрайн агьну ия цала ссийчIан Кушка тIисса шагьрулийн нанисса ЧIаратусса оьрчI. Кушкалийн пропускардай бакъа къабитлай, ци банссарив къакIулсса му, чIаххувщарнил ттул цIа бувсун, на кумаг бантIиссар куну, гьан увну ия. Ттун тийх гьар кIанай кIулсса бия. На кумаг бувссия мунан пропуск ласун. Дагъусттаннайн бувкIун махъгу жу, цал-цал ккаккайвав. Рабиятлун 74 шин дур. Ванил оьрчI бакъар, цIуллу-сагъшиврулгу мушакъатну бур, ялапаршиннарал шартIругу щалара ххуйсса дакъар. Мунияту, ттула дустурал зумаритавал байрандалий цадакьа бан ччивахха тIий цIухху-бусу буллалисса чIумал, на Рабиятлуя бувсъссия». Ванил тагьар чIалачIисса Мисиду «Инсан» фондрайнгу, цила дустурайн, кIулминнайнгу бувккун, ванин кумаг бансса чаран ляхълан бивкIун бур. Мисидул оьвкуну бур цила дусшиву дусса блогершайн, Рабиятлул ичIаллил шартIру, хаснува гъараллу ларчIун махъ хъиннура оьрмулун нигьачIисса тагьар хIасул хьусса ванил къатри ккаккан дан. Пикри хьуну бур мунингу, гъараллал зарал биян бувсса Мамедкъалаливсса цила шяравудушнингу кумаг баву мурадрай ихIсандалул концерт дан. Мисидул леххаврил чIу бавну, жула артистъталгу, шайсса кумаг бувну, хIала бувххун бур.
Ва ца концертрайну къуртал хьуну дакъар Мисидул ихIсандалул давуртту. Ва гьуртту шайсса бур хасъсса аьралий операциялийминнан кумагран цайми артистътурал дуллалисса концертирттайгу. – Ттул концертирттан, на дуллалисса цумурцагу ихIсандалул даврин кумаг бай, чIарав бацIай ттулва кулпат, гъан-маччами, шяраваллил агьлу. Хъунмасса барчаллагь тIий бура ттула шяравудуш ПатIимат Сайпуттиновахь,горгазрай инженерну зузисса Ваччатусса Рамазан Сулаймановлухь, Эльвира Илиясовахь, Щалагу Аьрасатнал мушакъатминнал обществалул Каспийскаллал организациялул председатель Аьйшат МахIаммадовахь, шагьрулул бакIчинал мушакъатминнал масъаларттаха зузисса кумагчи Арсен Базаевлухь, Аьбдулаьзиз Алхасовлухь, Пайзанат Асельдеровнахь, – тIий бур Мисиду.
Ва инсаншиврул бутIа ххишалану буллусса, чумартсса хъамитайпалул оьрмулул ва захIматрал ххуллиягу кутIану бусанна. Бувну, хъунма хьуну бур Мисиду ЧIяйннал шяраву, Рамазаннул ва ПатIиматлул кулпатраву. Вайннал кулпатраву 12 оьрчI (7 уссу, 5 ссу) бивкIун бур. Школагу ванил шиккува къуртал бувну бур. Щар хьуну махъ, 90-ку шиннардий, ласнащал Туркманисттаннайн лавгун, 15 шин дурну дур Мары тIисса шагьрулий. Мисиду каялувшиву дуллай бивкIун бур 220 оьрчI усса школалул столовайлий. Общепит лавкьуну махъ, цила ттучан тIивтIуну, микку зий бивкIун бур. Балай учаврил бюхъурив ваниву чIивинийва бивкIун бур.
– На чIивисса чIумал жул ичIува мудан макьаннал чIурду бикIайва. Уссурвал мандолиналий рурцунма бикIайва. Хъунама уссийл цала мандолина бивщуну, жу къавтIутIи, балайтIутIи байвав, – буслай бур Мисиду. Школалий дуклакисса шиннардийва гьуртту шайсса бивкIун бур райондалий дуллалисса циняв культуралул мероприятиярттай. Туркманнавусса чIумалгу ванийн мудан хъатIайн-хъиншивурттайн балай учин оьвчайсса бивкIун бур. Дагъусттаннайн бивзун махъ Мисиду зун бивкIун бур Каспийскаллал Культуралул къатлуву. Ми шиннардий концертру ккаккан дуллай ва бивну бур цимирагу организациялийн. 2009-ку шинал Каспийскалий ккаккан дурну дур ванил цила цалчинсса сольный концерт. Ва концерт Мисидул сахIналийнсса ххуллул хъиндайдихьу хьуну дур. Ва кьини ва бахьлаган бувну бур тIутIавун.
– Щап куну бувцIуну бия зал. АрулцIалва авурсса кацI бия та кьини тамашачитурал бахшиш бувну. Оьрмулуву мудангу инсаннан ттущава шайсса кумаг буллан бикIара. Минналгу бувмургу дакIний на лахъа-хъун бара, – тIий бур Мисиду. КIилчинмур сольный концерт хьуну дур Ваччав. Вагу дакIний личIансса хьуну дур.
– Та бия декабрь барз. Бувну бия хъунмасса марххала. Ва дякъий, ва марххалттанивух цу учIайссар концертрайн тIий бия ттухь. Нарив бучIаншиврий мукIруну буссияв. Циван къабучIави. БувцIунни зал. Концерт къуртал хьуну махъ ттучIан гъан хъанай, ца ххуйну бигьалавгруча тIий, зукьлай бия, – дакIнин бутлай бур Мисиду. Мунияр махъ ванил цимирагу сольный концертру ккаккан дурну дур. 2023-ку шинал Мисиду гьуртту хьуну бур Р.ХIамзатовлун 100 шин шаврин хас дурсса шадлугърал мероприятиялий Камчаткалий. Лакрал, яруссаннал, узбакIнал, туркманнал, азирбижаннал ва оьрус мазурдийсса балайрду увкусса Мисиду личIи-личIисса миллатирттал инсантал яхьусса Камчаткалий хъинну хъатру ришлай кьамул бувну бур. Ванил концертирдайнсса билетру тачIав ххирасса къабикIай. ХьхьичIсса шиннардий Мисидул репертуардануву чIявуми балайрду бия цила шяравучу, гъанчу Бадави Рамазановлул мукъурттийсса. ЦIанамур репертуар хъунмурчIин Дюхълиясса ХIадисхъал ХIадислул мукъурттийсса дур. Хаснува бюххансса бур хасъсса аьралий операциялий чувшиврий жан дуллусса, ЧIяйннал шяравасса Нариман Сулаймановлухасса балай. ЦIими бусса, инсаннан кумаг бан чялишсса Мисидул цила арсгу мукуна тарбия увну ур. Рустам МЧС-рал структуралуву ххассалбувуну зий ур.
Мудан дуллалисса чирилул давурттацIун, Мисидул хъунмасса кумаг бай дахьва сахIналийн буклакисса балайчитуран, ччарча канийну, ччарча маслихIатрайну. Цила концертирттайн кIункIу бувну, ккаккан бай вай тамашачитуран. Мисидун пикри бур сант дагьайхту, Аллагьналгу кабакьирча, хасъсса аьралий операциялийн гуманитар кумагращал гьан. ТIайлабацIусса аьрххи хьуннав!
Андриана Аьбдуллаева
