Ккуллал райондалий Ххувшаврил байран дайдирхьуна Совет Союзрал Вирттаврал АхIмад-Хан Султаннул ва ЦIаххай Маккаевлул гьайкаллацI тIутIив дишаврия.
ЧIяйннал шяраваллил шанбачIулийсса Цаххай Маккаевлул гьайкалдануцI дунни ххарисса ва пашмансса пикрирду дакIурдиву хIасул буллалисса байрандалул дайдихьу. Райондалул бакIчи Ажуб ХIусмановлул кIицI лавгунни ппухълуннал гьунарду абадлий агьалинал дакIурдиву бикIантIишиву.
Яла дяъвилий талай бивкIсса ппухълуннал суратирттащал, ттугъащал ва плакатирттащал чIявусса агьали хъун кучалийх дастта дурну Ваччиял чулинмай дямайданнивсса АхIмад-Хан Султаннул гьайкалданучIан бувккунни, тиччагу – Вирттаврал АллеялучIан.
Дастталул бакIрай най бия кузоврал тийгу-шийгу ЯтIул ттугъру пперха тIисса автомашина. Кьини дарщусса духьурчагу, мяйжаннугу чIявусса агьлу бувккун бия байрандалул хIурмат лахъну бушиву ккаккан буван. Гъаралуннил шювшусса, пар-пар тIисса кучалийх най бушиврувугу дия Ххувшаврил лирцIусса мукьал журалийсса ххуйшиву.
Аллеялий тIутIив дишайхту, паркрал сахIналий ккаккан дунни хъуннасса концерт. Райондалул творчествалул коллективирдал, дуклаки оьрчIал ва садикирттал тарбиячитурал ккаккан бунни яргсса номерду. Ва дия мюрщими ва хъуними дакIру ца дурну цачIун хьусса унгу-унгунусса байран. ТIабиаьтрал тагьардануяр чаннасса. БавтIцириннал дакIру патриот асардал гьузиххин дуллалисса ва лахъину дакIний личIансса. ЯлунчIингу вара даражалий лахъа-хъунну байран хьунадакьин цинявннахьхьун цIуллушиву дулуннав!
ПатIимат Рамазанова
