Июльданул 26-нний Дагъусттан Республикалул Конституциялул Кьини МахIачкъалалив Дусшиврул къатлуву хьунни паччахIлугърал наградартту дуллалисса шадлугърайсса батIаву. ЛичIи-личIисса арардаву, иширттаву хьхьичIун ливчуминнан наградартту дуллай ия Дагъусттан Республикалул БакIчи Рамазан АьбдуллатIипов.
Бадрижамал Аьлиева
Шадлугъ дайдихьлай, Да­гъусттан Республикалул БакI­чинал увкунни:
— Ванияр 22 шинал хьхьичI кьамул дурссар республикалул цIусса ва агьаммур закон, цилгу дирхьу­сса демократиялул низам. Аьрасатнал Федерациялул ва Дагъусттаннал Конституцияртту кьамул дурссар та бигьа дакъасса чIумуйн бувну. Жулва билаятрал ххуллу бигьа­сса къабивкIссар. Жулва инсантурал, хаснура хъунмур никирал, цикссагу бувхIуссар. Гайннал бивкIссар кьянкьа хьусса, цIакь хьусса пикри-зикрирду, мировоззрение, гайннал дуручлай бивкIссар жулла хIукумат, талай мунихлу.
Жува цасса халкьру. Яла захIматмур чIумал дагъусттанлувтурал чIарав ивкIссар Аьрасатнал Федерациялул Президент Владимир Путин. ХIакьинугу Аьрасатнан бигьасса чIун дакъар. ЦIана жува щаллу буллалисса масъаларттугу щалвагу билаятран аьмссар. ХIакьну му ххуллийхри нанисса Аьрасат Владимир Путиннул каялувшиндаралу. Жун ччай бур ххуй-хъиншивуртту дуллан, лайкьсса билаятрал лайкьсса гражданталну бикIан…
Гьарца шинал Дагъусттан­нал Конституциялул Кьини кIицI лаглай, жува цалнияр цал гъан хъанан аьркинссару Конс­титу­циялучIан, — увкунни Рамазан ХIажимурадовичлул.
Республикалул БакIчинал каруннива наградартту ларсунни ва кьини 65 инсаннал, медициналуву, кIулшиву дулавриву, спортраву, культуралуву ва цаймигу арардаву хьхьичIуннайшивурттайн бив­сса. Бур миннавух лакгу. «Дагестан» ВГТРК-лул хъунама директорнал хъиривчу Ссалам Хавчаевлун; ПатIимат Чутуеван (Камил Чутуевлул кулпат) дуллунни «ДР-лул культуралул лайкь хьу­сса зузала» тIисса цIа; Нурианна Каллаеван дуллунни «ДР-лул лайкь хьусса артистка» тIисса цIа; Гъумучиял школалул завуч Асият Айгунован — «ДР-лул лайкь хьу­сса учитель» тIисса цIа. Ва кьини паччахIлугърал наградартту дуллуминнавух хьусса лакраяту личIину чичинну кказитрал хъиривсса номердавасса цания цанний.