Июльданул 21-нний хьунабавкьунни Дагъусттан Республикалул миллатрал политикалул министр Татьяна Гамалей ва режиссер МахIаммад Казиев. Хьунабакьаврийсса хъунмур ихтилат хьунни режиссернал творчествалиясса, Каннай хьусса кинофестивальданийсса мунал гьурттушиндараясса.
Бадрижамал Аьлиева
МахIаммад Казиевлул бувсунни цала уттинин дурми давурттая, вания тиннай дуван дакIниймуния, цала буттал – цIа дурксса чичу ва сценарист Шяпи Казиевлул сценариярттайн бувну ларсми кинордая.
МахIаммад Казиевлул социал трагикомедия «Оьтту» («Кровь») ккаккан бувну бур Каннай хьусса 69-мур Дунияллул халкьуннал дянивсса кинофестивальданий. МахIаммадлул цала фильм ккаккан дурну дур «ShortFilmCorner» секциялул лагрулий (короткометраж фильмардал мурцIу).
«Оьтту» фильмрал сюжет щаллу дурну дур миллатирттал масъаларттайну. Ца автобусраву хьунабакьлай бур личIи-личIисса миллатирттал, оьрмулул шиннал хъами ва арамтал: байкер, патриот, Ккавкказнавасса лачIунукку, Африканавасса студент, студентка, Молдавиянавасса шупир ва куннащал кув бяст буллалисса ми цинявппагу ца маслихIатрайн буцин хIарачат буллалисса къари-бава. Бястрив байбивхьуну бур Пушкиннуя – мунал мархри ча наниссар тIисса суалдануя. Ахиргу бяст буллан бивкIун бур цуманал оьттур яла ххуймур тIий. Ва питналул, фильмрал ахир хъинсса, ххуйсса хъанай дур, ци бухьурчагу.
МахIаммад Казиевлул бувсмуних вичIигу дирхьуну, Татьяна Гамалейл чIурчIав дунни ва фильмраву гьаз бувсса масъалартту ххишала бакъа агьамсса бушиврий, умуд бивхьунни миллатирттал дянивсса дусшиву, дакьаву гуж даву мурадрай жагьилсса режиссернал дуллалисса давурттал Аьрасатнал обществалул цашиву, нахIушиву цIакь давриву агьамсса кIану бугьантIишиврийн.
Гихунмайсса ихтилатру хьунни, Дагъусттаннал миллатирттал ляличIишиву, дусшиврул идеяртту машгьур буллалисса, миллатирттал дянивсса арарду цIакь дуллалисса социал роликру, кутIасса фильмру сакин дуллай, вания тиннайсса уртакьшиврийсса зузаву хъиннура гуж дуллалаврия.
Ахирданий Татьяна Владимировнал бувсунни цала ведомствалул му аралуву дуллалисса даврия, хъамаллурал ляличIиссара къулагъас дуван бунни «Дагестанцы в судьбе России» проектрах.
