Мартрал 24-нния 26-ннийн бияннин МахIачкъалалив «Надежда» тIисса реабилитациялул центрданий консультацияртту дуллантIиссар Китайнавасса ДЦП хъин дайсса хьхьичIунсса пишакартурал.
Китайнал пишакартал бувкIун бур республикалийн «Панда» тIисса дунияллул халкьуннал дянивсса проектрал лагрулий, Аьрасатнал оьрчIал фондрал ва Дагъусттаннал ЗахIматрал ва социал лябуккулул министерствалул сакиншиннарай. Делегациялуву бур хIакин-хирург, оьрчIал неврологиялул ва хирургиялул эксперт Ши Шенкун, мукунма «Шэндэ» тIисса клиникалул пишакартал. Вайннал ххалбан тIий бур 100-нния ливчусса оьрчIру. Консультациярттал хIасиллайн бувну, гьарица оьрчIан цанна-цаннасса реабилитациялул план дантIиссар. Аьркин багьлай бухьурча, Китайнал медициналул центрдай хъин хьун гьансса направление хIадур дантIиссар.
«Панда» проектрал мурад бур ДЦП дусса оьрчIан ва миннал кулпатирттан кумаг баву. Проект щаллу дуллалиссаксса хIаллай ххал бувну бур Аьрасатнал личIи-личIисса регионнаясса 1000-нния ливчусса оьрчIру. АцIвахъул оьрчIру хьхьичIунсса технологиярттай хъин хъанай бивкIун бур Китайнаву.
Андриана Аьбдуллаева
