Вай гьантрай Москавлив «Босфор» тIисса ресторандалуву, чIявусса бусравсса хъамалгу гьуртту хьуну, лахъа-хъунну кIицI ларгунни 1-мур ранграл капитан, философиялул элмурдал доктор, профессор, «Дагестан» МЦК-лул вице-президент, лайкьсса дагъусттанлув, ххаллилсса лаккучу, хIакьсса патриот, ЧIарттал шяравасса ХIусман-ХIажи Аьлиевлул 90 шинал юбилей.

Мероприятие тIитIлай, юбиляр дакIнийхтуну барчагу увну, ванал оьрмулул ва захIматрал ххуллия бусласисса ихтилат бунни «Дагестан» МЦК-лул президент, техникалул элмурдал доктор, профессор Арсен ХIусайновлул.
ХIусман-ХIажи Сулайманов увну ур 1936-ку шинал март зурул 17-нний ЧIарттал шяраву.1954-ку шинал увххун ур С.М. Кировлул цIанийсса Лавайсса даражалул аьралий ва хьхьирил училищалул минно-торпедный факультетрайн. Му къуртал байхту, къуллугъ буллай ивкIун ур ЛухIи хьхьирил флотрал жамирдай, «Благородный» тIисса эсминецрал минно-торпедный группалул командирнал къуллугърая тIайла хьуну, «Ворон» тIисса къаралданул жамилул командирнал хъиривчунайн ияннин.
1956-ку шинал щаллу буллай ивкIун ур Ухссавнил флотрал «Ленинский комсомол» тIисса атомный щинал вивх духхай къаехърал командирнал хъиривчунал бигарду.
1968-ку шинал мусил медальданий къуртал бувну бур Лениннул цIанийсса аьралуннал ва политикалул академия. Мунияр махъ академиялул философиялул кафедралул адъюнктну (аьралий вузирдал аспирант), преподавательну ва хъунама преподавательну ивкIун ур.
1980-1983 шиннардий Авгъаннаву, тайннал Ярагъу­ннил гужирдал агьаммур политуправлениялий советникну къуллугъ буллай ивкIун ур. Ванал чичайсса бивкIссар Авгъанисттаннал президент Бабрак Кармаллунсса докладру. Гьуртту хьуну ур душманнайн къаршисса талатавуртту хIадур давриву. Ванал хъунмасса хIарачат бувссар совет ва авгъан аьралуннаву ливтIусса чансса хьун. Цайннагу щаву дирссар тай дяъвилул иширттаву. ХIусман-ХIажи Сулайманович хъанахъиссар ЮНЕСКО-лул чулухасса дипломрал лауреат.

1983-ку шинал октябрьданий ХIусман-ХIажи ивтун ур Химический защиталул аьралий академиялул жяматийсса элмурдал кафедралул хъунаманал хъиривчуну. 1992-ку шинал февральдания байбивхьуну зий ивкIун ур вава вузрал профессорну. ХIусман-ХIажи Сулайманович хъанахъиссар «Дагестан» МЦК-лул вице-президент.
Ва Центрданул мудангу хъуннасса къулагъасрайн лавсун ­буссар Дагъусттаннал, Москавуллал, Аьрасатнал аьдатру, аьралуннал тарих ябаврил ва майшан чаврил масъала. Ва масъалагу лавайсса даражалий щаллу буллай буссар Дяъвилул ва захIматрал фронтрал ­ветерантурал совет. 2015-ку шиная айивхьуну Советрал председательну уссар ХIусман-ХIажи Сулайманович, – бувсунни Арсен Буйдалаевичлул. Ванал бахшиш дунни юбилярнан «За верность Дагестану» медаль.
Гихунмайсса юбилейрал мажлис бачин бувну ия медициналул элмурдал доктор, профессор Жаруллагь Аьшуев. Усттарну тамадяшивугу дуллай, ихтилатирттал лях-карах ххаллилсса лакку балайрдугу тIий, чIюлу бунни ванал мажлис. Хъирив хъинну бюххансса ихтилатгу бувну, уссин хас бувсса шеъри бувккунни ХIусман-ХIажинал ссийл Аминатлул.
Юбиляр барча уллалисса, ванал лайкьшивурттая ва хъинсса хасиятирттая бусласисса, ванацIун бавхIусса ишру дакIнин бичлачисса ихтилатру бунни Аьрасатнал элмурдал академиялул член-корреспондент, медициналул элмурдал доктор, профессор Сяъдуллагь Абакаровлул, элмурдал доктор МахIаммад Оьмаровлул, отставкалийсса милицанал полковник Абас Аьлишаевлул, полковник Сулайман ХIусайновлул, психологиялул элмурдал доктор, доцент Зоя Хановал (ванил бахшиш бунни юбилярнан ххаллилсса лакку балайгу), психологиялул элмурдал кандидат, доцент Гулизар Башанаевал, «Дагестан» МЦК-лул президиумрал член Даниял Шабановлул, «Дагестан» МЦК-лул, Дагъусттаннал вакилханалул ва Мариян Илиясовал цIанийсса «Дараччи» ихIсандалул фондрал вакилтал Шовлукь Илиясовал, Басират Билаловал, Ххадижат Цаххаевал, Саида Мехтиевал, Маржанат Аьлиева, ПатIимат Садыковал ва м.ц.
ХIусман-ХIажи Сулаймановичлун хас бувсса шеъригу бувккуну, интнил байрандалул лишанну хъанахъисса бартагу бахшиш дунни Ххадижат Цаххаевал. ПатIимат Хайбуллаевал махъ лахъайхту, ТтурчIиял ПатIимат Аьлиевал макьаннахун лакку къавтIавуртту ккаккан дунни ванил арснал душнил. Цинявннан асар хьунни ХIусман-ХIажи Сулаймановичлул кулпатрал, оьрчIал, оьрчIал оьрчIал, гъан-маччанал дакIнийхтунусса барча бавуртту.
– Ппу жун гьармуниву эбратну ия. Ванал насихIатру оьрмулуву мудан бучIи лякъай. Жун мудан асар хъанан бикIайва жува аякьалийсса, вихшала дишинсса хъаттиралу бушиву, – увкунни арснал Русланнул.
– Барчаллагь ххаллилсса тарбия дуллусса арснахлу, жуятува бивзсса виха лавхьхьусса, вин лайкьсса наслулухлу, – увкунни арснал щарнил.
Кулпатрал ПатIиматлул хIаз бизанну бувсунни чIявусса гьалмагъайтурава ХIусман-ХIажи циван язи увгьуссарив. Ванин ХIусман-ХIажинал аьралий янна ва цIай бусса усру ххуй дирзун дур.
Миллатран бусравсса юбиляр барча ан увкIун ия Москавлив­сса «Дагестан» МЦК-лул дуллалисса циняв мероприятиярттай цукунчIавсса багьагу къалавсун гьуртту шайсса Рашид Багатаев. Ванал балайрдалгу хъиннува чIюлу бунни мажлис.
Лайкьсса дагъусттанчув, лакрал миллатрал пахрулунсса арс, хIакьсса патриот, яхI-къириятрал ва узданшиврул заллу.
УрцIалла шинал лажиндарай бувтсса оьрмулуву цавагу лахIза къавхьуссар ванаща бюхттулну «Честь имею» учин къашайсса. Цала даражалухгу, лайкьшивурттахгу къаурувгун, ХIусман-ХIажи Сулайманович уссар хъисвагу пахру-ххара бакъасса, дакI-аьмал хъинсса, аькьилшиврул ва инсаншиврул бутIа ххишалану буллусса. Вай хасиятру кIицI лаглай бия мажлисрал цинявппа гьурттучитал. ХIусман-ХIажи Сулаймановичлул юбилейрал мажлис хьунни цува кунма гъилисса, чаннасса, рахIатсса. Ва ахьлаган унни тIутIавун. Юбилярнал лагма лаган бунни хъунисса аьлимтал ва бюхттулсса даражалул хIаписартал.
Ахирданий ХIусман-ХIажи Сулаймановичлул ва ванал кулпатрал дакIнийхтуну барчаллагь увкунни мажлисрал сакиншинначитурахь, цинявппагу цала кьини хъун дан, чIарав бацIан бувкIминнахь.
УрцIалла шинал лахъишиврийсса оьрму лайкьну бувтсса ХIусман-ХIажинал юбилейран хасну Ххадижат ЦIаххаевал чивчуну бур вай ххару:

***
ЧIарттал шяравату
ссапар бавхIуну,
Авгъаннал аьрщарайн
ияннин лавгун,
Бюхттулсса шачIантту
ина лавхъунни,
Чувшиврийсса ххуллу
ина бивтунни.
Илкинсса хьхьирирдайх
гьузуй лавгунна,
Капитаннал цIуртти
хъачIунтIай лавчIун.
Ахттар дунни ина
захIматсса элму,
Лайкьну дурурччунни
докторнал цIагу.
Оьрмулул чивчусса
даптардануву
ХIусман-ХIажинал цIа
чанна лархъун дур,
Миллатрал тарихрав
мусил хIарпирдай
Эбратну чирчунни
ина вилла цIа.
Андриана Аьбдуллаева