«Интнил хьхьунил» байрандалуцIун дархIусса шадлугъру ласун Лакрал райондалийн Москавлия бувкIун бия НТВ каналданул корреспондентътал. Вайннащал ия цIана хасъсса аьралий операциялия игьалаган увкIсса жула Оьмар МахIаммадовгу.
Цалчин вай бувкIуна Ансар Къажлаевлул ужагърайн, вайннал хъамал ликкай къаттагу ххал бан, ванал кулпат Дианал дуллалисса лакку дукрардаягу сюжет дан. Лавсунни Диана хъурунхъусса гьаллалисса ва бартри дуллалисса куц.
Муния махъ, маркIачIан чIумал, федерал каналданул журналистътурал лавсунни байрандалия цанма хIазгу, билаятран ккаккан дансса сюжетгу. ХIайран бувну бия зунттал тIабиаьтрал караматшиврул, халкьуннал аьдатирттал ва магьирлугърал аваданшиврул, яла-ялагу агьалинал дакI аьчухшиврул ва хъамал ххирашиврул.
Байран къуртал хьуну махъ интервью ларсунни райондалул бакIчи Зураб Куччаевлуща. Ванал бувсунни халкьуннал аьдатру ядаврия, цашиву дуруччаврил ххуллий «Интнил хьхьунил» байрандалул цукунсса кIану бугьлай бивкIссарив. КIицI лавгунни «Новруз байрандалий» щала Дагъусттаннай гьарца шинах батIайсса бушиву цикссагу азарахъул инсан, «Интнил хьхьуницIун» дархIусса мероприятие хьуну душиву Ккавкказуллал агьалинал магьирлугърал ца агьамсса бутIану. Миллатирттал аьдатирттал аваданшиврул, аслийсса колоритрал ва байрандалийн кIункIу буллай бушиву чIявусса туристътал.
Му бакъассагу, Зураб Куччаевлул бувсунни район хьхьичIуннай шаврил ялувсса цала пикри, туризм хьхьичIуннай даврил ва халкьуннал аьдатру дуруччаврил ххуллий дан дакIнийсса давурттая. КIицI лавгунни дуркIун душиву чIун буттал улклул авадансса магьирлугърал ирсирах жяматрал къулагъас дан багьлагьисса, хъамаритала хъанахъисса халкьуннал сянатру зана дан багьлагьисса. Вай ляличIисса хасшивуртталли туристъталгу кIункIу бувну, кIанттул бренд хIасул даврицIун кабакьу бантIисса, – увкунни Зураб Куччаевлул.
– Жун ччай бур жула район аьрасатлувтал бигьалаглан къулайсса шартIру дусса кIанттурдайн кIура даен дан», – увкунни ванал. Умуд бивхьунни ляличIисса магьирлугърайхчил ва агьалинан хъамал ххирашиврийхчин район анаварсса бущилий лахъан тIий душиврийн билаятрал туризм хьхьичIуннай хьусса кIанттурдал сияхIрайн.
Зулайхат Тахакьаева
