ЧIявусса илгу бавтIун, хъуннасса сийлий дунни Лакрал райондалий жуйнна буттахъая ирсирай нанисса «Интнил хьхьунил» байран. Ччан бизансса кIану бакъая Гъази-Гъумуксса ­«Жагьилтурал паркрал» хьхьичIсса майданнив. Байрандалийн бавтIун бия, Гъази-Гъумуча бакъасса, лагма щархъавассагу агьали.

Байран сакин дурну дия Лакрал райондалул администрациялул ва Магьирлугърал управлениялул. Хъунмасса хIарачат бувну бия сакиншинначитурал байран инсантуран асар хьунсса куццуй дан. Мунийнсса хIадуршиннагу щархъаву дайдирхьуну дия хьхьичI гьантрайра. Хъами дуллай бия «Интнил хьхьуницIун» дархIусса аьдатсса дукрарду: аьрайн гьавккури, хьхьахьари ва, яла-ялагу, гьарца никирал оьрчIру ссавур дакъа ялугьлан бикIайсса барта – «Интнил хьхьунил» ­агьаммур лишан.
Щархъал хъаннил дянив хIакьинугу яхьуну дур бястлий бартри шахьаврил аьдат – гьарца шяраваллил дур цилла хасшин, куц. Мяйжаннугу, барта – му анжагъ нацIу ччатI бакъарча, хъамитайпалул магьиршиврул гьунар, ганил цила кулпатрахсса, оьрчIахсса ччаву ва аякьа тасттикь дуллалисса зат дур. Цурдагу хъунмурчIин шахьай оьрчIан, гьарцаннан цанна-цанна цIа куну. Му пишкаш дайссар «Интнил хьхьуницIун» бавхIусса аьдатсса халкьуннал тIуркIурдай ххув хьусса оьрчIан бахшиш хIисаврайгу.
Байран цурдагу тIиртIуна бартри ккаккан даврийну. ЛичIи-личIисса бартригу канихьну оьрчIру, барталухасса саннардугу ккалай, къавтилул лагма бувккуна:

Ва барта мяш, барта мяш!
Барта-урцIи мяш!
Вай хъамул хъурзилтту мяш!
Хъахъи муккул
гьиссилтту мяш!
Ва барта мяш, цIу барта мяш!
Ссав кIучIин мусил
кIурчIлу мяш!
Щялу диххан арцул
кказа мяш!
УрчIва цIуку – ЦIахъарав,
ЦIиннарал гьи – Бархъарав!
Ва барта мяш, барта мяш!
Барта- къакъа, мяш!

Хъирив райондалул бакIчи Зураб Куччаевлул барча бувна бавтIми, гьарца кулпатран цIуллушиву, буллугъшиву ва талихI чIа тIий.
– «Интнил хьхьу» буттал буттахъаяра нанисса ца яла хьхьичIарасса аьдатри. Инт дучIаврищал тIабиаьт чантI тIий дур, агьали къурув буклай бур. МуницIун дархIусса дур «Интнил хьхьуну» дайсса дуаьрдугу. ХIасил, авадансса дур «Интнил хьхьуницIунсса» халкьуннал фольклор. Жува пахрулий бикIан аьркинссару ппухълуннал авадансса рувхIанийсса ирсирая. Му буруччингу буржлувссару, жуйнна жула ппухълуннал диян дурсса куццуй, журагу жула хъирив наниминнайн ирсирай тапшур дан», – увкунни Зураб Куччаевлул.
Байрандалий гьуртту хьунни щархъал творчествалул коллективрду, Гъумучиял оьрчIал магьирлугърал школалул тарбиялувтал.
Сакиншинначитурал хIадур бувну бия тIуркIурду ва конкурсру, ххув хьуминнан бахшишран дуллай бия бартри. Байрандалул программалуву къавтIий, балайрду тIиминнацIун бахIлай бия хъамалгу, аьдатсса дукрардал урцIуягу бисмиллагь буллай.
Байран диялну лахъи ларгуна. «Жагьилтурал паркрачIату» агьали пас хъанай байбивхьусса чIумалгу цIаран лархъунна дия ВацIилу- зунттуй «ИНТ» тIисса чичру, БурхIай-Къалалул ухнилу – «МИР» тIисса чичру, агьалинал дакIурдиву халкьуннал цашиврул асарду ва гьавас кьабитлай.
«Интнил хьхьунил» байран хьунни аслийсса халкьуннал аьдатру дуруччаврил ххуллий ппухълуннал ва хъирив нанисса никирттал дянивсса дахIаву цIакь дуллалисса хIакьсса барашиннану.