АхIмадлул душ Халилова Загьидат бувссар 1940 шинал ЧIурттащиял шяраву, хъудугьултрал кулпатраву. Ва ччяни нитти-буттацIа хьуссар: буттал, фронтовикнал Буттал кIанттул цIанийсса Хъун дяъвилий жан дуллуссар, чIал къархьуну, нинугу ларгссар дунияллия. Ва тарбия хьуссар, буттауссил, фронтовикнал ХIасанов Сулайманнул кулпатраву.
ОьрчIнияцIава кIулшивурттал хъирив багьсса душ дуклай бивкIссар зунттал душваврал интернатраву. Дуклан бувхссар яла Буйнакскаливсса Педагогический училищалувун. Ва училище къуртал байхту, дуккаврил итххявхсса душ Москавлийн гьан буллай бивкIссар вузраву дуклан. Цахара аякьа дуллалисса буттауссин цуппа вузраву дуклакиссаксса хIаллайгу харж-хуржлилсса буллан багьанссар тIий, ламус бувну къалавгссар.
ЗахIматрал оьрму байбивхьуссар 1963 шинал ЦIуссачIурттащиял арулшинал школалий байбихьулул классирттал учительницану. Найбунува гъирарай зий бивкIссар, оьрчIан цIакьсса ва куртIсса кIулшивуртту дулаврицIун, творчествалул чулухагу итххяххан буван, пикри буван, хъанахъимунил хIисав ласун лахьхьин буллай. Шанма мукъуйну учин, давриву дакI дирхьуну. Школалул чIявусса выпускниктурал цалчинмур учительницар. Тамансса, ванил дарс дирхьусса оьрчIал райондалул олимпиадарттай хьхьичIунсса кIантту бугьайссия. Учительница ва насихIатчи хIисаврай цищава шайсса кумаг цIуну бувкIми учительтурангу бувайссия. Дарсру лавайсса даражалий дишайсса педагог хIисаврай ванил цIа ларгссия. Дарс дишаврил кьяйда, методика лахьхьин ванил дарсирдайн бучIайссия цайми учительталгу. Райондалул кIулшиву дулаврил отделданул хъуниминнал вания эбрат ласун маслихIат бувайссия.
Цилва даврия лахъисса хIаллай хIура къавхьуну Загьидат АхIмадовнал тарбия бувссар ххуйсса хIакинтал, учительтал, агрономтал, инженертал. Ванил хIурмат лахъну буссия учительтурал, нитти-буттахъал ва оьрчIал дянив. Махъсса шиннардий пенсиялийн бувккун бигьалаглай буссия ЦIуминалий ЦIуссачIурттахь.
ХIукуматралгу ванил захIматран лайкьсса кьимат бивщуну бур. Ва бур Дагъусттаннал лайкь хьусса учитель, лайкь хьуну бур «ЯтIул Ттугълил ордендалун» ва «За трудовую доблесть» ва цаймигу медальлан.
Нитти-буттаха кунмасса хIурмат учительтурахагу бикIан аьркинссар тIун бикIай. ТIагу-тIайлар. Нитти-буттал жунма оьрму булурча, учительтурал жува кIулшивурттал дунияллийн буккан бувссару. Жул заманнай лахънугу бия, мяйжаннугу, учительтал, бусравнугу бия. Оьрмулухун барчаллагьрай бикIара нагу ттулва цалчинсса учительница Загьидат АхIмадовнайн. Ттун ваничIа так подклассраву дукланни нясив хьусса. Яла жул кулпат шагьрулийн бивзуна. Амма ттун шагьрулий бувккусса 10 класснияр, та подкласс дакIний ливчIунни. ЛичIаврил биялагу Загьидат АхIмадовнал гьунарди. ТачIав хъама битан шайссарив ттулва учительницал, ниттил захIматрал гьунар. КIанттуву авхIусса оьрчIгу кьаивтуну дарс дишин бучIайва, на гьан бувайвав лях-карах оьрчI ивзунувагу акъарив ххал уван.
Та заманнул агьлува ляличIисса бия, бакIрайн ларсмур дюрхъуну дуван ччисса, яхIлувсса, къирият дусса, оьрму агьалинан мюнпатранну бутан ччисса.
Загьидат АхIмадовнал ласнащал, МахIаммад Сайпуллагьовичлущал ххюва оьрчI ларайсса кIулшивурттугу дуллуну, чивун буккан бувссар. Циняв цалва кулпатиртталсса буллай буссар, ххаллилсса нитти-буттал цIагу ядуллай ва гьаз дуллай.
Загьидат АхIмадовнал, ка дургьуну тIиссакссагу, кIулшивурттал чаннайн буккан бувсса циняв учениктурал, мунил буккин-чичин лахьхьин бувцириннал, мунил гъилисса дакIнил бутIа бивцириннал цIанияту жижара буллай бура жулва хъама къабитантIисса цалчинсса учительницал гъанцириннахь.
Яргсса, ххуйсса, инсаншиву лахъсса оьрму бувтссар Загьидат АхIмадовнал шяраваллил агьулданул дянив. Жяматран цуппа кунма, ххирассия ванин цинмагу шяраваллил жямат. Гьарца бивкIу-буккулий, шяраваллил оьрмулул иширттавух хьхьичIунминнавух бикIайссия.
Лавгссар дунияллиягу жул цалчинсса учительница адаврай оьрму бувтсса кунма марцIну, алжаннул къапурду тIивтIусса, мубараксса Зумаритавал зурул махъсса гьантрай. Цилва оьрмулул зана-кьулушиндаран лайкьну. Цуппа кIулциринначIа циявасса чаннасса аьпа кьабивтуну.
ЦIуссачIурттащиял школалул дуклаки оьрчIал ва шяраваллил жяматрал цIанияту Рамазаннул душ
Гульшан Хасаева
