Премьер-министрнал профилсса ведомстварттайн ташур бунни ккаккан дуван арцу дачIаврил гьартасса анализ ва гужлан дуван ОМС-рал системалий зузисса цивппа заллусса (частные) клиникарттал давурттал ялув бацIаву.
Аьбдулмуслимовлул бусаврийну, ва тема цимилагу гьаз дурну диркIун дур батIавурттай, хьхьичIра дурну диркIун дур цивппа заллусса медициналул сакиншиннардал аудит. Ккаккиярттайн бувну, 2025 шинал республикалул ОМС-рал системалуву гьурттуну дия 271 медициналул учреждение. Миннувату 110-паччахIлугърал учреждение, 3 федерал даражалул, лирчIми – 158 дия цивппа заллусса медициналул учреждение.
Премьернал дакIнин бувтунни ОМС-рал арцу хъанай душиву агьалинан медициналул кумагран арцу дучIайсса яла агьаммур кIануну. Гьамин, ми арцу тIайлану дачIаврийн хъар хъанай душиву хIаллихшинну ххуйну ва цила чIумал бартдигьаву, инфраструктура лядуккаву, зузалтрал кIулшилул даража лахъ баву. МуницIун бавхIуну премьенал махъру лахълахъиминнахьхьун буллунни цаппара суаллу.
Аьбдулмуслимовлул цIувххунни, цуми принципирттайн чул бивщуну дачIайссарив арцу цивппа заллусса медидарарттайх ва цукунсса контроль буссарив бюджетрал арцу цила ххуллий харж даврил ялув.
Мукунма премьернан кIул бан ччай бия цукун буручлай буссарив госсекторданувусса духтуртал ва цукунсса ххуллурду ишла буллай буссарив хIакинтал коммерциялул клиникарттайн къалихъланшиврул.
Аьбдулмуслимовлул личIину цIувххунни региондалул Росздравнадзорданул цивппа заллусса медидарарттал давурттал хIакъиравугу.
Ми темардан хас бувсса махъру лавхъунни цIуллу-сагъшиву дуруччаврил министрнал хъиривчу Наби Кураевлул ва ОМС-рал Дагъусттаннайсса фондрал каялувчи АхIмад Гудовлул.
