Аьрасатнал Халкьуннал цашиврул шинал лагрулий «Илчи» кказитрал баян буллалиссар Чувшиврул ордендалул кавалер, СВО-лий ватандалул ххуллий чувшиврий жан дуллусса Алик Гъазиевлул аьпалун цIа кусса, оьрчIал лакку мазрай дюхханну назмурду дуккаврил республикалул кIилчинмур конкурс. Ва хас дуллалиссар ватандалул, халкьуннал дянивсса цашиврул темалун.

Конкурсрал учредитель хъанай бур «Илчи» кказитрал отделданул редактор, Алик Гъазиевлул ниттирссу Зулайхат Тахакьаева. Ххув хьуминнан дипломру ва бахшишру дулунтIиссар Зулайхатлул.
1-мур кIану булунтIиссар ца инсаннан (10 азарда къуруш);
2-мур – кIиннан (ару-арулазарда къуруш);
3-мур – шамуннан (ххю-ххюазарда къуруш).
ДикIантIиссар тамашачитурал язи увгьуманансса личIисса премия: Телеграм каналданий яла чIявусса чIурду бавтIманансса – 5000 къуруш. ОьрчIру назмурду ккалаккисса видеортту гьан дувара ватсапрайн ва номерданий: 8-960-415-06-94.
Ккаккан дурну дикIан аьркинссар назму ккалаккисса оьрчIал цIа, фамилия, буттал шяравалу, шин. Шагьрурдайминнал – цивппа дуклакисса школардал номердугу. Ххув хьусса оьрчIру конкурсрайн хIадур бувсса учительтуран (ниттил хIадур увхьурча, ниттин) булунтIиссар Барчаллагьрал чагъарду.
ТIалавшинна: видеортту дикIан аьркинссар ккалаккиманал чIу баянну, бувчIинну, аьлагъужа къабагьанну, ххуйну чIаланну ларсъсса! Назмулул цIагу, авторнал цIагу чара бакъа ккаккан дан аьркинссар!
Видеортту кьамул дуллалиссар майрал 15-ннийнин.
Ялугьлагьиссару!