Уттигъанну Москавлив лайкьну дурурччунни медициналул элмурдал кандидатнал диссертация Ккуллал шяравасса Абуязидлул ва Ритал душ Фарида Мурачуевал.Фарида ва аьрххилий нанисса ч1умал ттул хъисвагу щак бакъая ванил диссертация ларайсса даражалий дуруччиншиврий.
ЧIярусса шиннардий Дагъусттаннал ЦIуллу-сагъшиву дуруччаврил министерствалий жаваблувсса къуллугъирттай зузисса ванил ниттищал Рита МахIаммадовнащал дахIаву дуну, ттун кIулссия ванил оьрчIру циняв итххявхсса, дуккаврил гьунар бусса бушиву.
Рита МахIаммадовна цуппагу, ванил уссу-ссугу медициналул ххуллий чIярусса лайк ьшивуртту дурсса, лавайсса даражалул пишакаршиву ккаккан дурсса инсантал бур. Медициналул ххуллийх лавгун бур Мурачуевхъал шанмагу оьрчIгу.
2005-ку шинал мусил медальданий МахIачкъалаллал 7-мур школагу къуртал бувну, Фарида бувххун бур Дагъусттаннал медициналул институтрал педиатриялул факультетрайн. Институтгу ванил ЯтIул дипломрай къуртал бувну бур. 2013-2015-ку шиннардий бувккуну бур неврологнал пиша куртIну лахьхьинсса ординатура.Му къуртал байхту зун бивкIун бур ОьрчIал ва балугъравун къабивминнал нервардал ва психикалул цIуллушиву дуруччайсса республикалул центрданий («Республиканский центр охраны нервно-психического здоровья детей и подростков»).2017-ку шинал ванил пишакаршиврул даража чIалай, бивтун бур мюрщи оьрчIал(ца зуруя шанна шинайн бияннинсса оьрмулувусса) психо-неврологиялул отделениялул хъунмурну. ХIакьинусса кьинигу шикку зий бур. Фаридал каялувшиву дуллалисса отделениялий хъин хъанай бур щалагу Дагъусттаннаясса неврологиялул патология дусса яла захIматми оьрчIру. БувчIлачIисса зат бур, укунсса отделениялул заведующийнайгу хъуннасса жаваблувшинна душиву. ХIакьинусса кьинигу отделениялул даврия ва шиккусса пишакартурая рязи бакъасса кIанттурду къавхьуну бур нитти-буттал чулуха. Ялунгума , шиккусса пишакартурайн, хаснува отделениялул хъунмунийн барчаллагьрай бур рахIму-цIимилий оьрчIал ялув бацIлай тIий. Фарида цила пациентътурал ляличIишивугу, нитти-буттал тагьаргу бувчIлачIисса, инсаншиврул бутIа буллусса хIакин бур. Ванин кIулли нитти-буттал буруккин, хIарачат буллан бикIай миннал дакI данмур, вихшала къакьукьинмур бан. Оьтту-ттурчIавухра инсаншиврул, хъиншиврул бутIа буллусса Фарида ххирасса бур оьрчIал нитти-буттан бакъассагу, даврил уртакьтурангу.
2016-ку шиная 2020-ку шинайн бияннин Фарида дуклай бия неврологиялул пиша куртIну лахьхьайсса аспирантуралуву.Февраль зуруй ванил лайкьну диссертациягу дурурччуну, медициналул элмурдал кандидатнал цIа ларсунни.
Цумацагу инсаннал оьрмулул, пишалул ххуллий хьхьичIуннайшивуртту , лайкьшивуртту ккаккан дурсса чIумал ччан бикIай ганал нитти-буттая, мархрая кIул бан, бусан, цанчирча инсаннал ххуймургу, оьккимургу мархрая нанисса дикIай.
КIицI лавгсса куццуй, Мурачуевхъул циняв, кулпатрал бакI дургьусса Абуязид личIаннин (ва аьраличу ур) медициналул ххуллу язи бувгьуну, агьалинал цIуллу-сагъшиврул къаралданий бавцIусса инсантал бур. Медицина вайннал агьлу-авладрай ирсирай нанисса пиша бур. ЦIанасса чIумал Дагъусттаннал ЦIуллу-сагъшиву дуруччаврил министерствалул отделданий каялувшиву дуллалисса Рита Мурачуевал цIа лакран ххуйну кIулссар. Цала-цала буруккинттащал, кумаг аьркин багьлай ванийн къабувксса чансса бухьунссар. — Гьарица ишираву, оьрмулулгу, пишалулгу ххуллий ттун эбратну хьуссар ттула нину,- тIий бур Фарида.
Фаридал бава-ттаттагу (Ритал нину-ппу) медициналул зузалт бивкIун бур. МахIаммад Тариевич шяраву бусравсса ветеринар хIакин. Краснодонная бувкIун, чIярусса шиннардий Ккуллал азарханалий патронаж медсестрану зий, хъунмасса захIмат бивхьусса Евгения Григорьевнарив Ккуллал жяматрал хIакьинусса кьинигу хIурматрай ва барчаллагьрай дакIнин бутай.
Фаридал уссийл ХIасаннул ЯтIул дипломрай къуртал бувну бур Самаралий Аьралуннал ва медициналул академия. ЦIана ва Республикалул травматологиялул центрданий травматологиялул отделениялий каялувшиву дуллай ур.ЧIивимур ссу Жамиля оьрчIал невролог бур. Ва Фаридал каялувшиву дуллалисса отделениялий зий бур. ХIасаннул кулпат, ласкъатлувугу цинявннан ххирасса Гьумай, оьрчIал стоматологри. ХIасан ва Гьумайгу диссертация дуруччин хIадур хъанай буссар. ЧIа учинну вайннангу тIайлабацIу.
Фаридал ва Камиллул шанма оьрчI бур. Арснан Мухаммадлун 4 шинни. Душвавран, цаннин цила ниттил, цаннин ласнал ниттил цIарду дирзун дур Фаридал. Саидатлун 14 шин дур, Ритан -11. Ци кIулли, бюхъайхха вайнналгу медицина язи дугьан, нитти-буттангу, агьлу-авладрангу лайкьсса ххаллилсса хIакинтал хьун. Ци чулийгу, нитти- буттал дак1ру ххари дансса хьуннав.
Шиккува бусан, Фарида лакран хъинну бусравсса «Инт» этнокафелул заллу Саидат Дундаровнал арснал щарди.
КIивагу чулухасса ххуйсса мархрая бивзсса наслугу бава-ттаттахъан лайкьсса хьуншиврий щак бакъар.
Барча тIий буру Фаридахь, Рита МахIаммадовнахь, Саидат Дундаровнахь элмулул ххуллийсса лахъазан. Мунияргу бюхттулми шачIанттугу лавхъун ккакканнав.
