ЧIяву миллатру бусса жулла республикалул маданиятраву ккалли бансса иш, шадлугъ къархьусса кьини къашай. КIицI лаганну вайннувасса цаппара.
Культуралул
министерствалун
90 шин
ЧIяру культурарду дусса жулла региондалул ца хьхьичIавамур идаралун – Дагъусттан Республикалул Культуралул министерствалун 90 шин там хьунни. Ва таварихран хас дурсса шадлугъру дуллантIиссар шинал мутталий. Цалссарив, бивтсса ва хъунмасса лайкьсса ххуллу республикалул культуралул зузалтрахь барча кунни региондалул культуралул министр Зарема Буттаевал.
– Жува пахрулий буссару дунияллий бур учинсса сахIнарду цайн мютIи бувсса цIа дурксса музыкантътурая, къавтIаврил коллективирттая, мукъул усттартурая, артистътурая, цимирагу аьсрулийсса халкьуннал канил пишардал кьюлтIшиву дуручлачисса усттартурая. Министерствалул юбилейрал хIакьинусса кьинигу хъанахъиссар сахIналийн уклакисса, музейрал экспонатру дуручлачисса, оьрчIан ххуймур лахьхьин буллалисса ва цалла аьрщи ххирасса гьарцагу инсаннал кьинину, – укунсса ххаругу бур министрнал барча баврил ихтилатраву.
Хъаннин хасну
Оьруснал театрданул чIивимур залдануву хьунни Дунияллул халкьуннал дянивсса Хъаннил байрандалун хас дурсса батIаву.
Ваний гьуртту хьун оьвкуну бия, личIи-личIисса касму-сянатру язи дургьуну, республикалул ва билаятрал цIа-кьини гьаз дуллай зузисса хъаннийн, хасъсса аьралий операциялул гьурттучитурал кулпатирттайн ва гъан-маччаминнайн.
БавтIми Дагъусттан Республикалул бакIчи Сергей Меликовлул цIания барча бунни Дагъусттаннал ХIукуматрал председательнал хъиривчув Муслим Телякавовлул.
Оьруснал маданиятрал мажлис
П.С. ХIамзатовал цIанийсса Дагъусттаннал изобразительный искусствардал музейраву хьунни «Оьруснал культуралул вечер».
Ва сакин дурну дия музейрал ва Республикалул Халкьуннал творчествалул къатлул. Ва хьунни Аьрасатнал Халкьуннал цашиврул шинал дайдихьулул шадлугъирттал лагрулий.
Шикку ва хьхьуну тIиртIуну дия «Дагестанская летопись Клары Власовой» тIисса выставка. Ва хас дурну дия ванияр ца-кIира шинал хьхьичI аьпалул хьусса Дагъусттаннал халкьуннал художник Власова Клара Филипповнан 100 шин шаврин. Шиккува кIицI лаган, Москавлиясса художницал къачансса дирхьуссар цилла кIилчинмур ватанну хьусса Дагъусттаннал шяраваллал суратру, вайннувух – Гъумучиялссагу, вайннувух – «Домик в Кумухе» тIиссагу.
«ЦачIу жува – Аьрасатру»
Дагъусттаннал Культуралул министерствалучIасса Республикалул Халкьуннал творчествалул къатлул регионнал дянивсса «Вместе – мы Россия» цIанилусса акция-флешмоб зузи дунни.
Ва хьунни Аьрасатнал Халкьуннал цашиврул шинацIун дуллалисса давурттал лагрулий. Ва даврил мурадгу бур билаятрал халкьуннал дянивсса дахIавуртту цIакь даву, халкьуннал цашиву чIалачIи даву ва халкьуннал культуралул ирс машгьур баву.
Дагъусттаннал ва Татарстаннал республикарттал культуралул аралувусса уртакьшиврийсса зузаврил хIакъираву чирчусса кьутIилийн бувну, ванивух гьурттуну бур кIирагу региондалул культуралул идарартту.
Буттахъал пиша
МахIачкъалалив социал журалул школа-интернатрай хьунни Республикалул Халкьуннал творчествалул къатлул буллалисса халкьуннал канил пишардал ирглийсса мастер-класс. Ва ххуллухь оьрчIачIан буттал буттахъая шиннайра нанисса касму-сянатрая бусан ва му ккаккан дуван увкIун ия заргал Хидриилияс АхIмадов.
Халкьуннал художникнал юбилей
Дагъусттаннал халкьуннал художник, М.А. Жамаллул цIанийсса Дагъусттаннал художествалул училищалул директор Мухтар Камбулатовлул кIицI ларгунни оьрмулул 60 шинал юбилей. Художник барча унни Дагъусттан Республикалул культуралул министр Зарема Буттаевал. Цилва ихтилатраву ванил кIицI лавгунни Мухтар ХIажиевичлул, цала буттал дайдирхьусса даву гихуннайгу дачин дуллай, Дагъусттаннал сурат дишаврил искусствалуву Камбулатовхъал творчествалул династия лайкьну ккаккан буллай ушиву.
Бадрижамал Аьлиева
