Ларгсса ххуллун кьини МахIачкъалаллал бакIчи Муса Мусаевлул ва ДР-лул Ишбажаранчишиврул ва инвестициярдал агентствалул каялувчи Башир МахIаммадовлул цачIу ххал бувунни машлул ва логистикалул центр «Атеста» бувантIисса кIану.

З. АьбдурахIманова
Шагьрулул бакIчинал бувсунни, МахIачкъалаллал администрациялул хасъсса ча­гъарду хIадур бувну, «Атеста» ООО-лул проект дурсса компаниялул каялувшиндарахьхьун дулунтIишиву ва центр буван­сса аьрщарал 30 гектар ккаккан дуллалишиврул ихтияр.
Мукунма Башир МахIамма­довлул кIицI лавгунни, МахIач­къалаллан ва щалва Дагъусттаннан проектрая хъунмасса маэшат хьунтIишиву ва проектрал презентациягу хьунтIишиву чIал къархьуну Сочилий хьунтIисса халкьуннал дянивсса Маэшатрал форумрай. Мукунма ванал кIицI лавгунни, республикалуща федерал центрданул чулуха кумаг бакъа проект щаллу дуван къахьунтIишивугу. Шагьрулул бакIчинал ва агентствалул каялувчинал ххал бувунни проект дуллай байбишинтIисса ЦIусса Хушетрал чIаравсса кIану. Ши­кку дувантIиссар цIусса микрорайон ва хъуни машинарттан­сса ххуллурду ва миннуя ликкан дурсса хъус дишинсса склад­ру. Проект щаллу даврийну азарахъул инсантурансса зузи кIанттурду хьунтIиссар.
Шикку бувантIиссар ахъул­сса, ахънилсри дишинсса 37 азарда кв. метралийсса опталул база, 6,5 азарда кв. метралийсса ангар (хъус зия къахьун, ми дя­къин дувантIисса), 3,5 азарда кв. метралийсса бизнес-центр ва 3 азарда кв. метралийсса автосалон. Мукунма бувантIиссар мизит, машинартту бацIансса кIану ва цаймигу иширттансса кIанттурду.
Проектрал цалчинмур ятIап щаллу хьунтIиссар 2018 шинайннин.