Ттигъанну Москавлив хьусса «Единая Россия» партиялул 15-мур съездрай гьуртту хьунни му партиялул МахIачкъалаллалмур отделениялул №100 первичная организациялул секретарь, 1-мур ЦIувкIратусса ХIажинал душ Лаура Кьурбанова. Ва цуппагу зий бур Дагъусттаннал Жагьилтурал министерствалий.
ПатIимат Рамазанова
Съездрал хIасиллу дуллай, Лаурал бувсунни «Единая Россиялул» агьаммур мурад бушиву иширттайну агьалинал мурадру щаллу буваву ва хьхьичIун лавсъсса бигарду бартбигьаву. «Съездрай Аьрасатнал Президент Владимир 
Владимировичлул, аьщуй-дазуй авцIуну, балжину бувсунни хIакьину агьалинал оьрму къулай хьуншиврул цукунсса давурттив дуллан аьркинссарив, экономика сантирай ва лябукку буну хьхьичIуннай хъанан аьркиншиву ва му ххуллий цукунсса чаранну ккаклай буссарив. ЧIурчIав дунни парламентрал депутатътурал гьарцагу инсан аякьалувун лавсун икIан аьркиншиву, гьарманал чIу баян аьркиншиву, — тIий бур делегат Лаура Кьурбанова. — Нава Аграрный университетрал аспиранткагу бухьувкун, аграрная республикалул вакил хIисаврайгу, ттун хъинну гъира бия шяраваллил хозяйство хьхьичIуннай даврил хIакъираву тIутIимуних вичIидишин. Жул делегация гьуртту хьунни «Аграрная сверхдержава» тIисса бяст-ччаллийсса дискуссиялуву. Микку гьаз бунни шяраваллил хозяйство ччаннай дацIан дуваврил масъалартту, ихтилат бия кредитирттал ресурсирдая, шяраваллурду цIусса сельхозтехникалул дузал даврия, шяраваллил хозяйствалул цIусса технологиярттая. Жунма кIулли «Единая Россия» шяраваллил инсаннах дагьайкунсса аякьа дикIан аьркиншиврул ва шяраваллил инсаннан кумаг аьркиншиврул тарап дургьусса партия душиву. Дагъусттаннайгу дур жагьилсса аграрийтурацIун кабакьу буллалисса федерал программардугу, республикалулссагу. Партиялул председатель Д. Медведевлул каялувшиврийну Саратоврай хьуссия «Единая Россиялул» хасъсса аграрный форумгу. Партиялул тIалав бувна аграрийтурая шяраваллил хозяйство гьаз дувансса программа сакин дуван. Единоросстурал му бигар ххуйну биттур бувссар АПК хьхьичIуннай даврил программа сакин дурну».
Аьмну съездрал даврин кьимат бишлай, Лаура Кьурбановал кIицI лавгунни, съездрай ихтилат буллай, билаятрал бакIчи Владимир Путиннул дакIнийн бувтшиву партия 15 шинал хьхьичI хIасул дуршиву, хъунмасса совет билаятрал тили-тихъа хьусса территориярттугу цачIун дурну, ялун дирсса захIматшивурттава букканшиврул, билаятрал аргъ занаританшиврул. Лаурал бувсунни съездрай гьуртту шаврил даврихсса гъира-шавкь ххи дуршиву, тикку мюнпатсса ихтилатру хьушиву, цуппа тамансса, щалвагу Аьрасатнаву сийлийсса инсантуращал хьунабавкьушиву. КIицI ларгунни мукунминнава машгьурсса хоккеист, вратарь, тренер, Аьрасатнал Хоккейрал федерациялул президент, Госдумалул комитетрал член Владислав Третьяклул ва Дунияллул Халкьуннал чемпион Бувайсар Сайтиевлул цIарду.
