Октябрьданул 28-нний «Дагестан» РИА-лий республикалул миллатирттал политикалул ва диннал иширттал министрнал къуллугъ чIумуйну бартбигьлагьисса Тамирлан АбутIалимовлул бувсунни ноябрьданий чичинтIисса Этнографический диктантрайнсса хIадуршиннарая.
Ванал кIицI лавгунни, гьашинумур диктант ацIийлчинмур хъанай душиву, цурда диктантгу Аьрасатнал циняв регионнай ва кьатIаллил билаятирттай чичинтIишиву. Бувсунни ва диктант жулва билаятрал президентнал сипталийну дуллалисса «Аьрасатнал ва СНГ-лул миллатру» тIисса Дунияллул халкьуннал дянивсса фестивальданул мероприятиярттал программалувун руртшиву.
Пресс-конференциялий гьуртту хьунни Миннацрал миллатрал политикалул ва информациялул управлениялул хъунама МахIаммад Даитбагьов ва «Аьрасатнал халкьуннал Ассамблеялул» региондалул отделениялул председатель Зикрулла Илиясовгу. Вайннал бувсунни диктантрай чIявусса инсантал гьуртту хьуншиврул, хаснува жагьилтал, цукунсса давуртту дуллай буссарив. Диктант тестрал журалийссар. 45 минутIрал дянив Аьрасатнал халкьуннал тарихрайн ва культуралийн багьлагьисса 30 суалданухьхьун жаваб дулун багьлагьиссар. Диктант чичин хьунтIий дур онлайн-журалийгу.
ХьхьичIунсса баллу лавсминнан дулунтIий дур бахшишру.
