Дагъусттаннал луттирду итабакьай издательствалул 100 шинал юбилей лахъа-хъунну кIицI ларгунни вай гьантрай.
Оьруснал драмтеатрданул чIивимур залданувун бавтIцириннавух бия ХIукуматрал хъунаманал хъиривчу Рамазан Жяъпаров, культуралул министрнал хъиривчу Мурад ХIажиев, Дагъусттаннал Чичултрал союзрал хъунмур Марина АхIмадова-Колюбакина ва цаймигу бусравсса вакилтал.
Хъамаллуран ккаккан дурна «Дагестан» ГТРК-лул журналистътурал хIадур дурсса, издательствалул тарихрая балжину бусласисса документал журалул киносурат. Рамазан Жяъпаровлул Дагъусттаннал бакIчи Сергей Меликовлул цIанияту барча буллай, кIицI лавгуна республикалул 14 мазрай луттирду итабакьлакьисса издательство чIяву миллатру бусса республикалул литературал ирс ябуллалисса гьанумур идара хъанахъишиву.
Издательствалул директор Марина Оьмаровал бувсуна я Аьрасатнаву, я кьатIаллил билаятирттай укунсса идара цамур бакъашиву, 1970-1990 шиннардий шинай 300 лу итабакьайсса бивкIшиву. БавтIцири барча бувна Мурад ХIажиевлулгу. Ванал Культуралул министерствалул цIаниятусса ХIурматрал грамотарттугу дуллуна. Чичултрал союзрал чулуха идаралул коллектив барча бувна Марина АхIмадовал-Колюбакинал. ХIукуматрал цаймигу наградартту дуллуна издательствалул хьхьичIунсса зузалтран.
ПатIимат Рамазанова
