Аьрасатнал халкь миллатру личIи къабуллай, бавкьуну ялапар хъанахъишиврия бусласисса «Это Кавказ» тIисса документал сериалданул презентация хьунни Пятигорскалив «ТАСС Кавказрал» къатраву.
Ва сериалданул генеральный продюсер Петр Павловлул бувсунни ххюрагу серия хас дурну душиву Ккавкказуллал халкьуннан, укунмасса инсантурал кьадардания, оьрмулия бусласисса иширттан.
«Цалчинмур сериялуву бувсун буссар яруссаннал ва лакрал мархри хIала бувхсса кулпатрая. Ва кулпатрал гьаз бувну буссар философиялул суал: буссарив талихI дунияллий, бухьурча чув лякъин бюхъайссар – бюхттул зунттавусса ЧIухърал шяраву ягу мегаполисрай?» – увкунни ванал. Барчаллагь увкунни проектраву гьурттушинна дурцириннахь, миннавух кабакьу бувсса Дагъусттаннал бакIчи Сергей Меликовлухьгу.
Сериалданул съёмкарду шанна республикалий хьуну дур: Дагъусттаннай, Ухссавнил АьсатIиннаву ва Къабардин-Балкьарнаву. Сериал цурда хIадур дурну дур АьсатIиннал «Наследие» тIисса кинокомпаниялул.
Петр Павловлул кIицI лавгунни ялагу, сериалданул гьанумур мурад бушиву Аьрасатнал Ккавкказуллал оьрму бусса куццуй ккаккан баву, агьали цукун яхъанай буссарив.
Сериалданул режиссер Фатима Золоевал бувсунни, цуппа Дагъусттаннаясса подписчицал тIайлабацIан бувшиву аьсатIиннан щар хьусса оьрус Анастасиял, кулинарный блогернал страничкалийн. Ва кулпатращал гъанну кIул шайхту, цинма бувчIушиву кинораву вайнная бусан аьркиншиву. Гьаннайсса, ччавугу, дакI тIайлашивугу, аьдатругу агьамсса интернациональныйсса кулпат ккаккан буван, жагьилтурал, оьрчIалгу кулпат цукунсса бикIан аьркинссарив лаласуншиврул.
Мукунма бувсун бур СВО-лий талатиминнах ичIува кулпатру ва оьрчIру ялугьлагьисса лахIзардая, «Эльбрусский» тIисса ххассалбувултрал кьюкьлуя, машгьурсса спортсментурая.
Киносуратрал циняр сериярду октябрьданул ахирданий ххал дуван хьунтIий бур агьалинаща.
ПатIимат Рамазанова
