Дуккаврил ва элмулул министерствалулгу, ЦIуллу-сагъшиву дуруччаврил минстерствалулгу дурну дур Дагъусттаннал бакIчи Сергей Меликовлул каялувшиврий ххюра шинал мутталий хьусса хьхьичIуннайшивурттал хIасиллу. ХьхьичIуннайшивуртту хьуну дур агьамми социал бутIраву.
Дуккаву
Ххюра шинал мутталий республикалий тамансса цIу дурккуну дур дуккаврил инфраструктура: бувну бур 85 школа, цIанасса ппурттуву уттигу ца буллай бур. Бакьин бувну бур 381 школа, мукунма тIивтIуну бур 84 цIусса оьрчIал багъ.
Чялишну лябуклай бур ттизаманнул дуккаврил кIанттурду: дузал бувну бур 622 центр «Точки роста», 5 оьрчIал технопарк «Кванториум» ва 7 дуккаврил цифралул центр «IT-куб». Ялун ххи дурсса дуккаву дуван (для дополнительного образования) хIасул хьуну бур 81 азарва цIусса кIану.ЛичIинурасса къулагъас дурну дур спортрах: АцIвахъул школардай цIу буккан бувну бур спортрал заллу, ттуршвахъул дуккаврил учреждениярттай дурну дур ттизаманнул спортрал площадкартту, 35 школалий бувну бур цIусса мини-футболданул майданну. Лядурккуну най дур школардал педагогтурацIун ва пагьму-гьунар бусса дуклаки оьрчIацIун кабакьулунсса система. Ттуршуннаха ливчусса Даггъусттаннал учительтал зий байбивхьунни мюрщисса шагьрурдай ва щархъаву. 2021 шиная шинмай гьарца шинал яла хьхьичIунми 100 учительнал ласайссар 100 азарда къуруш премиялул. 1500-ннаяргу ххишаласса пагьму-гьунар бусса дуклаки оьрчIангу дуллуссар премияртту. Педагогтурал кIулшиву ларай даву мурадрай дузал бувну бур Квалификация лахъ дайсса центр ва Профессионалтал хIадур байсса центр.
ЦIуллушиву дуруччаву
ЦIуллушиву дуруччаврил бутIувугу хьуну дур хъинсса асарду личIан бувансса хIасиллу, миннувух «Здравоохранение» нацпроектрал кумаграйнугу.
Ххюра шинал мутталий дурну дур 230 объектрал реконструкция (цIу буккан баву) ва капремонт. Бувну бур 61 ФАП, 5 амбулатория ва 3 поликлиника. Медициналул идарарттан буллуну бур 350 санитар машина ва 1,5 азарда цIусса медициналул аьркинлугъ.
2021 шинал региондалул бюджетрал арцух бакьин бувну бур 49 медициналул учреждение, 5 шинал мутталий тIурча, медучреждениярттан буллуну бур 58 анаварсса кумаграл машина ва 55 занази байсса (передвижной) медкомплекс.
Региондалул проектрал лагрулий Республикалул онкоцентр дузал бувну бур 196 медициналул оборудованиялул.
«Земский доктор» программалийну шяраваллавун увцуну ур сайки 2 азара медициналул зузала. Сайки кIийлла ххи дурну дур льготниктуран уквасса дарурттахсса харжлугъ. 50 азаруннаха ливчусса инсантуран бувну бур лавайсса даражалул технология ишла дурсса медициналул кумаг.
ХI. Аьдилов
