Октябрь зурул 6-нний «Дагестан» РИА-лий хьунни Дагъусттаннал аьралий комиссар полковник АьбдурахIман Мурадхановлул ссуттилсса призыврал хIакъиравусса брифинг. Шикку гьуртту хьунни республикалул Аьралий комиссариатрал призыврал отделданул хъунама подполковник ХIусайн ОьмархIажиевгу.
АьбдурахIман Мурадхановлул инттумур призыврал хIасиллугу дурну, цIанасса призыврал хIакъираву бувчIин бавуртту дунни.
Аьрасатнал президентнал хIукмулий ккаккан дурсса инттулсса призыв Дагъусттаннай цила чIумал ва аьркинсса куццуй щаллу хьуну дур. Аьралуннаву къуллугъ бан Дагъусттанная лавгун бур 3700-нния ливчусса жагьилтал. Ми аьралий частирдавун тIайла буккан Ярагъуннил гужирдал авиациялул самолетирттал 11 рейс дурну дур.
Инттулсса призыврал кампаниялул чIумал самолетирттай, пассажиртурал поездирттай аьралий частьирдавун тIайла увккун ур аьмну 3600 инсан.
Аьралий комиссарнал кIицI лавгунни призыврацIун дархIусса давуртту ххуйну щаллу дурсса шагьрурдал ва районнал аьралий комиссариатру. Миннувух Лакрал, Ккуллал ва ЦIуссалакрал районнугу дия.
АьбдурахIман Мурадхановлул бусласимунийн бувну, ссуттилсса призыв най дикIантIиссар 1-мур октябрьдания байбивхьуну декабрь зурул 31-ннийн бияннин. Аьралуннаву къуллугъ бан буцлантIиссар 1995-2007-ку шиннардий бувсса жагьилтал.
Къуллугъ буллантIисса чIун даххана къархьуссар. ХьхьичIва кунма ца шинайссар буцлацисса. Призыв цила хутIрай наниссар ва хасъсса аьралий операциялуцIун къадархIуссар. Призыврай къуллугъ буллалими хасъсса аьралий операциялийн къабуцинтIиссар. Къуллугъ бан наними сборный пунктирдая тIайла буклантIиссар октябрь зурул 15-нния тинмай. Къуллугъ бан буцлациминнал шанма бутIул ца бутIа ттизаманнул аьралий техникалущал зун лахьхьиншиврул, дуккин тIайла буккантIиссар. Ми къуллугъ бан тIайла буккантIиссар дуккаву къуртал хьуну махъ.
Му бакъассагу, аьралуннаву сакин дуллантIиссар научно-прикладной бигарду бартбигьлансса элмийсса ротарду ва спортсментал хIадур буллансса шартIру дузал дурсса спортрал ротарду. Вай подразделениярттаву къуллугъ буллан ччиминная цукунсса тIалавшиннарду дуссарив ва призыврацIун бавхIусса цайми масъаларттая кIул бан бюхъантIиссар Аьрасатналл Обороналул министерствалул интернет-порталданий. Ссуттилсса призыврал кампания нанисса чIумал ишла дантIиссар информациялул система «Единый реестр воинского учета». Мунийн бувну, агана системалуву щаллусса информация бухьурча, къуллугъ бансса чIун махъун щун дан ччиминнаща му дан бюхъантIиссар комиссариатрайн къабувкIнува. Единый реестр воинского учета ишла дурну, дукIлантIиссар призывниктурачIан чагъарданий рирщусса повесткартту. Агана повестка дуркIсса призывник вари чинсса багьана бакъанма призыврал пунктрайн къаучIарча, кьува гьантлува закондалийн бувну му учIан ансса чаран лякъинтIиссар.
Повесткалул хIакъиравусса информации гьан байссар паччахIлугърал хIаллихшиннардал порталданийсса личный кабинетравун. Му журалий дакъассагу, уттигу гьан дуллалиссар чагъарданий рирщусса повесткарттугу. Уттисса призыврал дахханашиву му хъанай дур, агана аьралуннаву къуллугъ бан уцинсса хIукму бувну бухьурча, мунил гуж буссар щаллусса шинай. Ци-бунугу багьана хьуну цIанасса призыврай къагьарча, хъиривмуний тIайла уккантIиссар. Призыврал хIакъираву цIухху-бусу бан хьунтIиссар республикалул аьралий комиссариатрал тIайланнасса линиялийн оьвкуну. Тел.8-872-263-88-86; 8-872-268-16-07. Му зунтIиссар октяьрьданул 10-нния тихуннай гьарица кьини.
КIицI лаган, аьралий бурж лахълахъисса аьралийтал чIун къуртал шайхту шаппай итабакьинтIиссар.
Андриана Аьбдуллаева
