Дагъусттаннал муфти, республикалул Аьлимтурал советрал хъунама щайх АхIмад Апанди хъуннасса къулагъас дуллай ур хIакьину Украиннал аьрщарай хасъсса аьралий операциялий паччахIлугърал мурадру биттур баврил ххуллий талатиминнал ва Ватандалул цIаний чувшиврий жанну дуллуминнал кулпатирттах.

Тталаткьини ванал цачIава кьамул бунни аьралий бурж биттур буллай жанну дуллуминнал ва ятIа-тIар бакъа бакъахьуминнал ниттихъул ва щахъами.
Хьунабакьаврий гьуртту хьунни «Сила матерей» ккурандалул хъунмур Сефижат МахIаммадрасуловагу.

Муфтиналгу, ванал кулпат ва маслихIатчи Айна ХIамзатовалгу, ливтIусса аьралийтурал гъанчунахь жижарагу бувну, бувсунни дакI дансса махъру.
«Каши так Хъунасса Заннахьри дусса. КIанал чивчумунива буккансса чаран бакъассар. Гьарца инсаннал бакIрачIан бучIантIимур га дунияллийн укканнинма чивчуну буссар. ЧIа учара Аллагьнахь цIимигу, ссавургу», – увкунни АхIмад-хIажи Апандинал.

«Щалла дуниял Аьрасатнайн къарши дурккун дур. Ва тагьардануву жува лахIан бан къавхьуссару, хьугу къахьунтIиссару, мунил цIанийри зул арсваврал жард къакуну жанну дуллусса, зу кунмасса ниттихъал тарбия бувсса къучагъсса арсваврал гьавасраллу жува буручлачисса. Барчаллагь зун ссавурданухлу, дакIнил чумартшиврухлу», – увкунни Айна ХIамзатовал.

СВО-лул Аьрасатнал цалчинсса Виричу НурмахIаммад ХIажимахIаммадовлул ниттил Сапижат Мазаевал кIицI лавгунни Ватандалул мурадру буручлай жанну дуллуминнал ниттихъан ва щахъаннин мудан асар хъанай душиву Дагъусттаннал муфтинал ва ванал кулпат Айна ХIамзатовал чулухасса къулагъас.
Муфтинал чулухасса яла хъунмур бахшишну ниттихъан хьунни ливтIусса арсваврал рухIирдая ганал дурсса дуаь.
Щайхнал кIицI лавгунни тачIав хъамакъабитайшиву Ватандалул мурадру буруччаврил ххуллий жанну дуллуми ва хIакьинугу СВО-лий паччахIлугърал мурадру буручлачими цала дуаьлуву бишин.

Зулайхат Тахакьаева