ЦIуссалакрал райондалул администрациялул бакIчи МаматIи ХIамзатовлул каялувшиндарай хьунни агьамсса масъалартту ххал бигьлагьисса совещание. Шикку гьуртту хьун оьвкуну бия райондалул идарарттал каялувчитурайн ва шяраваллал бакIчитурайн.

БатIаврий хьхьичI ххуттайн лавсъсса масъаларттавасса бия ризкьи трассалийн ва жяматийсса кIанттурдайн буклан къабитансса къадагъа дишавриясса, миннух уругансса ва хъирив ивзун икIансса хIухчу личIи авриясса.

АьчIа дишин ккаккан бунни ччи-ччикун трассалийн ва жяматийсса кIанттурдайн ризкьи гьан бивтсса заллухъруннай. Мукунма тIалав бунни райондалул шяраваллал хозяйстварттавусса ризкьилул инвентаризация дан ва миннуй биркарду бищун, жяматийсса кIанттурду суцIлицIа марцI буккан буллалисса давуртту дан. БувчIавурттал кампаниярттай гьуртту хьунтIисса избирательтурал ва инсантурал сияхIру дан. Диндалул объектру сияхIрайн ласун.

Хьунни ихтилат инттусса призыврал кампаниялия. Райондалул призыврал план щаллуну биттур дурну дур. Утти аьралуннаву къуллугъ буллан гьан ччиминнаща ссуттилсса призыврал кампаниялувух хIала буххан бюхъайссар. Жагьилтал къуллугъ буллантIиссар аьралуннаву ца шинайсса.

ТIалав бунни хасъсса аьралий операциялул гьурттучитуран дулун ккаккан дурсса аьрщарал участкарттал ва кумаг баврил сияхIру низамрайн дуцаву.
Ххал бивгьунни налогру дулаврил даража ва цаймигу цIюрувкьусса масъалартту.

Ахирданий МаматIи ХIамзатовлул цIухху-бусу бунни шикку кIицI къалавгсса, райондалул щархъавусса агьамсса цаймигу масъаларттая.

Имара Саидова