Вай гьантрай агьалинащал хьунаавкьунни ДР-лул Халкьуннал Мажлисрал председательнал хъиривчу Камил Давдиев.

МахIачкъалалив ялапар хъанахъисса Асхат МахIаммадовлул бувсунни цIанасса ппурттуву хъуннасса нигьачIаву дусса дроннал хъирив бизайсса ва ми бат дайсса система хIасул дуршиву. Изобретательнал бусаврийн бувну, ва проект хъунмасса хайр буну ишла дан хьун най бур хасъсса аьралий операциялул ва цаймигу иширттаву. МахIаммадовлул тавакъю бунни проект иширайну дузрайн ­дуккан даврин кабакьу баву.

Давурттал дузал баврил хIакъираву кумаг бува тIий бувкIун бия Арсен Ибрагьимов ва Эльмира Багъдуева.
Камил Давдиевлул, цачIанма бувкIсса инсантурах личIлулну вичIигу дирхьуну, бувчIин бунни ми масъалартту щаллу баврил ялув ацIаву цала бакIрайн ласлай ушиву.

Имара Саидова