Ларгсса нюжмардий Гъуниннал райондалий хьунни Зунттал чяйлул фестиваль. Цурдагу Дагъусттаннал миллатирттал цачIундур кьюкьрал Надир-шагьнал аьраллу ххит буккан бувсса тарихран хасъсса, Ссугъращиял шяраваллил чIаравсса «Ватан» комплексраву.

Гьар шинах дувайсса ва фестиваль культуралул ва хъамаллурал яргсса байран шай. Программагу авадансса дикIай. Агьалинан дакIний личIансса дия гьашинумур программагу: оьрчIал суратру дишаврил конкурс, пагьламантурал шоу, оьрчIал къавтIаврил ансамбльданул къавтIавуртту. Хъамаллуран кIанттул нис, ницI ххал дувансса сант дия, гъан хъанай, тIин ххал буллай бия. Дия анаварну чяй хIачIаврил чемпионатгу. Ва чяй анаварну хIачIаврил бяст-ччаллил сиптачи «ХIакъикъат» кказитрал корреспондент Абаш Абашовлул бувсуна укунсса цалчинсса турнир хьушиву 2003 шинал.
Фестиваль лахъа-хъунну дуллан байбивхьуну бур ряхра шинал хьхьичI Тахо-Годил цIанийсса Национал музейрал филиал «Ватан» мемориалданул комплексрал каялувчи ХIамзат Оьмаровлул хIарачатрайну.

Абашиловлул кIицI лавгунни Зунттал чяйлул фестиваль Ссугъращиял жяматран агьамсса даву хъанахъишиву, чяй так хIачIия къахъанахъишивуча, жяматрал культуралул, аьдатирттал бутIа хъанахъишиву. КIицI лавгунни «Ватан» комплексгу Дагъусттаннал агьалинал чувшиврул хIурматран сакин бувшиву.
Ва фестивальданий хьхьуттайх лахъаврил гьунар ккаккан бувсса, 1-мур ЦIувкIратусса Камил Маммаевлулгу кIицI лавгунни цува мудангу гъирарай гьуртту шайшиву ппухълуннал гьунардал ва Дагъусттаннал халкьуннал цашиврул лишанну хъанахъисса кIанттурдайсса мероприятиярттай. Бувсунни комплексрал проектрал авторгу ГьунчIукьатIрал шяравасса Жаруллагьлул арс Керимов КьурбанмахIаммад ушиврия пахру бушиву.
Ссугъращиял шяраваллил администрациялул чулухасса Барчаллагьрал чагъаргу буллунни Камиллун.

ПатIимат Рамазанова