Вай гьантрай Москавлив Аьрасатнал МВД-лул Пишакартурал кIулшивурттал даража гьаз бавриха зузисса институтраву шанма гьантлул мутталий най дуссия «Лучший по профессии» тIисса цIанилусса конкурс.

ХьхьичIунсса пишакар язи угьлагьисса бяст-ччалливу гьуртту хьунни жула билаятраясса 99 инсан. Шикку гьуртту хьунни ЦIуссалакрал райондалиясса силисттачигу.
Конкурсрал программалийн бувну, пишакартуран аьркинну бия тахсиркаршиву аьч дан, уголов делорду ххал дан, криминал иширттаву тIайлану къуццу тIун кIулшиву ккаккан дан. Му бакъассагу, пишакартал спортрал итххявхсса, аьркинсса кIанттурдай медициналул кумаг бан кIулсса бикIан багьлай бия. Вай цинярдагу тIалавшиннарду лавайсса даражалий ккаккан дунни ЦIуссалакрал райондалийсса ОМВД-лул силистталул группалул хъунама, Маликлул арс АхIмадхан МахIаммадовлул.

АьФ-лул МВД-лул бакIчи, АьФ-лул полициялул генерал Владимир Колокольцевлул чулуха хьхьичIунсса кIантту бувгьусса пишакартал барча бунни ва миннан дипломру, кубокру ва дакIний личIансса бахшишру дуллунни АьФ-лул МВД-лул бакIчинал хъиривчу, генерал, полициялул полковник ­Александр Кравченкол.
«Лучший по профессии» конкурсрал 2-мур даражалул дипломран лайкь хьунни АхIмадхан МахIаммадов. Ванал цува куртIсса кIулшивуртту дусса пишакар ушиву исват бунни къуллугърайн зун увкIсса цалчинсса гьантрайва.

АхIмадхан, 2013 шинал ЦIуссалакрал 1-мур школагу къуртал бувну, дуклан увххун ур ДГУ-лул юридий факультетрайн. 2017-2018 шиннардий аьралуннаву къуллугъ буллай ивкIун ур. 2019 шинал увххун ур ЦIуссалакрал райондалийсса Аьрасатнал МВД-лул органнавун. Хъунма хIал къавхьуну ивтун ур дознаниялул группалул хъунаману. Даврил сант кIулсса, жаваблувну къуллугърал бурж бартбигьлагьисса пишакар итталу ивкIун ур хъуниминнал дянивгу. 2025 шинал мартрал 26-нний АхIмадханнул цалчинсса кIану бувгьуну бур силисттачитурал дянив нанисса республикалул конкурсрай.

Барча уллай буру лавайсса даражалий пишалул магьиршиву ккаккан дурсса жагьил. ТIайлабацIу баннав АхIмадханнун гихунмайгу.

Имара Саидова