Августрал 19-нний Дагъусттаннал бакIчи Сергей Меликовлул каялувшиврий хьунни ДР-лул Антитеррор комиссиялул ва Оператив штабрал батIаву.
Ххал бигьлай бия интернетравух терроризмалул ва экстремизмалул идеология ппив даврийн къаршисса чараннал масъалартту.
БакIрай Сергей Меликовлул бувсунни цIанасса тагьардания.
Ванал тIимунийну, махъсса ппурттуву интернетраву чялишну дачин дурну бусса бур тагьар оьлукъин дуллалисса информациялул ва пропагандалул даву. Жагьилтурал дянив машгьурсса соцсетирдаву идеологиялул муттаэтурал дачин дурну бур терроризмалул пропаганда ва миккун кIункIу буллай бур цIу-цIусса тарапчитал.
Республикалул бакIчинал бувсунни региондалий тагьар цалий дацIаврил, паракьатшиврул ца агьамсса сававну хъанахъишиву информациялул климатрал тагьар, му сакин шавриву хъунмур кIану бугьлай бушиву СМИ-лул ва социал сетирдал.
«Жунма чIалай бур инсантал ми социал сетирдаву лиян дуллай бушиву агьалинан агьамшиву дусса давуртту», – увкунни Меликовлул. Ванал бусаврийну, чIяруми Телеграм-каналлай даххана дан хIарачат буллай бур инсантурал аькьлу-кIулши (манипулируют сознанием людей), ппив буллай бусса бур бавккусса хаварду ва бартдигьлай бусса бур деструктивсса гужирдал заказру.
Мониторинграйну ашкара дуллай бур терроризмалул ва экстремизмалул идеология машгьур дуллалисса сайтру ва аккаунтру, миннуву салкьи дуллай бур дунияллул халкьуннал дянивсса терроризмалул сакиншиннардансса арцу.
МВД-лул информациялийн бувну, гьашинусса шинал 6 зуруй ашкара дурну дур 710 деструктивсса материал, миннувату 604 диркIун дур экстремизмалул ва терроризмалул мяъна дусса. Миннуясса нигьачIаву духлаган даншиврул, Роскомнадзорданул управлениялийн, дукьан даву мурадрай, тIайла дурккун диркIссар 704 материал.
Сергей Меликовлул властьрал органнайн ва муниципалитетирттайн тапшур бунни чялиш дуккан дуван информациялул давуртту, хаснура соцсетирдаву, гужлан дуван ихтиярду дуруччай органнал давуртту.
БатIаврий мукунма ххал бивгьунни терроризмалул чулухасса нигьачIаву дусса объектру буруччаврил масъалартту (транспортрал инфраструктурартту, дуккаврил идарартту ва чIявусса халкь батIайсса кIанттурду).
