Вай гьантрай МахIачкъалалив, Къараманнай, тIиртIунни 2023 шинал августрал 14-нний ЦIуссаккуллал шяраваллил чIарав хьусса пIякь учавриву оьрмурдацIа хьусса инсантурал аьпа абад буллалисса мемориал. Оьзру хьусса кIанай дацIан дунни аьпалул гьайкал ва шиккува тIивтIунни аьпалул сквергу.
Мемориал тIитIлатIисса митинграй гьуртту хьунни Дагъусттаннал бакIчи Сергей Меликов, МахIачкъала шагьрулул мэрнал бигарду чIумуйну биттур буллалисса Жамбулат Салавов, ЦIуссалакрал райондалул хъунама МаматIи ХIамзатов, жяматийсса ишккаккулт, ЦIуссаккуллал жямат ва апатIру хьуминнал ва ливтIуминнал мачча-гъанми.
ДакIнин бутанну, ванияр кIира шинал хьхьичI ЦIуссаккуллал шяравалличIан гъанну хьусса пIякь учавриву 37 инсан оьрмулуцIа хьушиву ва 120-ннан цIунцIияртту хьуну диркIшиву.
Аьпалул мажлис тIитIлай, Сергей Меликовлул цала ихтилатраву кIицI лавгунни, оьзру хьусса ппурттуву цала оьрмурдан нигьачIаву дунугу, кьини дурксса инсантал ххассал буллай, шайсса кумаг буллай бивкIшиву Дагъусттаннал халкь.
– Та оьсса кьини хъиннува исват хьунни Дагъусттаннал агьали ххишала дакъа ларайсса инсаншиву ва къирият дусса бушиву.
Хар-хавар бакъа ялун бивсса апатI сававну оьрмурдацIа хьуссар тамансса инсантал. Ятинтал хьуссар оьрчIру, арсурваврацIа, душваврацIа хьуссар ниттихъул, хIасил, ца лахIзалий бяливчIссар паракьатну ялапар хъанай бивкIсса инсантурал оьрмурду.
Ва жула цинявннал аьмсса къювур, аьмсса дардри. ХIакьину тIиртIусса гьайкалданул уттава бантIиссар ливтIуминнал аьпа, – увкунни Сергей Меликовлул.
Республикалул бакIчинал личIинува барчаллагь увкунни катастрофа хьусса кIанттурдай апатIру хьусса инсантал ххассал буллай бивкIсса медиктурахь, ихтияр дуруччай, пожарный ва ххассалбувултрал зузалтрахь, волонтертурахь. Мукунма барчаллагь увкунни мемориал дуллай ва мемориал дишинсса аьрщи хIадур дуллай бивкIминнахь, меценатътурахь.
Ва кьинисса аьпалул мажлисрай гьуртту хьунни тай иширттал барану хьусса Аьйшат Муртазялиевагу.
– ХIакьину жува бувкIун буру оьзрулуву оьрмурдацIа хьусса инсантал дакIнин бичин. ЦIуну тIиртIусса мемориал, ливтIуминнал аьпа абад баву бакъассагу, та яла захIматмур чIумал жула инсантурал чумартшиву ккаккан дуршиврул лишаннугу хъанахъиссар.
Хьувча ва мемориал мюхчаншиву дуруччин ва куннал чIарав кув бацIан кIулну бикIан аьркиншиву дакIнин бутай кIануну, – увкунни Аьйшатлул.
Мемориалданул автор МахIмуд Аьбдуллаевлул бусаврийн бувну, мукьмурцIуну лахъи дурксса гьайкал цакуну дялирчIун дур, баххана хъанай бур (инсантурал) ххуллу, амма ялагу бакI гьаз дурну хьхьичIунмай най бур. Гьайкалданийгу чивчуну бур: «Шикку вайннал оьрмурду бяливчIссар, амма вай дакIний личIантIиссар» куну.
Имара Саидова
