Вай гьантрай, цаппара хIаллай къашавайгу бивкIун, оьрмулул 70 шинаву лавгунни дунияллия 1-мур ЦIувкIратусса ХIусманнул ва Салисатлул душ ХIажиева Сакинат-хIажи.

Ва, буттал шяраву школагу къуртал бувну, МахIачкъалалив ЦIигьуртал хIадур байсса техникумравун дуклан бувхссия. Та заманнайсса сийлийсса пишагу лавхьхьуну, зий буссия ДГУ-лул экономикалул факультетрал аьшвашханалий цIигьурну, яла махъ – чIярусса шиннардий Стекловолокно заводралмур аьшвашханалий.
ЧIунну даххана шайхту, машлул даврихун багьну буссия.

Сакинат хъинсса дакIнил заллу, жяматрал дянив хIурмат бусса хъамитайпа буссия. ЗахIмат ххирасса, хъамаллурая ххарисса, сахаватсса, инсантуран хъинмур буван анавар буккайсса. Кулпатраву хъунмургу буну, даву нахIусса ва, ци журалул даврий зурчагу, яхI буллай, цаярва мюрщиминнангу нинушиву дуллай, агьлу-авладрайцириннангу цIакьсса чIарахбацIуя.

Совет заманная махъ хIажлийн занай байбивхьусса ппурттуву ЦIувкIуллал душвавраву цалчин хIажлийн лавгминнавух буссия. Шяраваллил жяматралгу, лагма-ялттуминналгу дянив кьадру-кьиматрайсса зунттал хъамитайпа буссия. Мудангу чялишну гьуртту шайссия шяраваллил жяматрайн багьайсса цинявппагу иширттавух.
Сакинатлул чIавама, шамилчинма, арс ХIусман, СВО байбивхьуния шинай Ватандалул мурадру буручлай уссар, тамансса орден-медальлан лайкь хьуссар. Нину дунияллия лагаврил кьурчIисса хаваргу ванан аьралий масъалартту бартбигьлагьисса кIанай бавссар.

Сакинат дунияллия лагаврил кьурчIишивугу кIидачIлай, жижара буллай буру арсваврахь, арсурваврал хъаннихь, уссихь, ссурваврахь, махъсса щалвагу агьлу-авладрахь.
Имандалий лавгун лякъиннав, махъминнахьхьун цIуллушиву дулуннав, алжаннул ххари баннав.

1-мур ЦIувкIуллал жямат