Буттал кIанттул цIанийсса Хъун дяъвилий бюхттулсса Ххувшаву гъан дуллай ивкIсса гьарцагу аьраличуная жунма хъунмасса пахру буссар ва абадлий ми дакIний бикIантIиссар.
Хаснува аьрая зана къавхьуми.

Цалчинмур ЦIувкIратусса хIаписар Юнусов МахIаммадлулгу Ватан душманная дуручлай жан дуллуссар. Сайки 70 шинай ятIа-тIар бакъа акъа хьуминнавух ивкIссар цувагу. Яла увччуну лявкъуссар аьмсса хIатталлий Славянск-на-Кубани тIисса шагьрулий. Ванал кулпатрал ПатIиматлул буттал лажин къаккарксса кIия арс Кьурбан ва ХIажимурад, душ СултIанат, ларайсса кIулшивуртту ласунгу бувну, чивун буккан бувссар. Буттах мякьнува ливчIсса оьрчIру, ххуйсса давурттайгу зий, агьалинан хъинну бусрав хьуссар.
Дарбантуллал агьалинан ххуйну кIулсса ХIажимурад дунияллия лавгун шинну хьунни, уссищал Кьурбаннущал ва буттал цIа дирзсса арснащал МахIаммадлущал буттал гьаттайн иянсса тIайлабацIугу хьуну.

Дагъусттаннал паччахIлугърал университетрал химиялул факультет ччаннай бацIан бувсса (чIярусса шиннардий деканну зий ивкIссар) аьлимчу Кьурбан, пенсиялийнгу увккун, игьалаглай уссар цIана.
Душнин СултIанатлун вай гьантрай оьрмулул 90 шин хьуссар.
СултIанатлул оьрму лавгссар ЦIувкIуллал оьрчIан кIулшивуртту ва тарбия дуллай. Ласнащал, Ккуллал ва Лакрал районнал Ветеринар управлениялий тамансса шиннардий каялувшиву дуллай ивкIсса, Дагъусттаннал лайкь хьусса ветврач СантIуев МахIаммадлущал цачIу мяйва оьрчI хъуни бувссия. МахIаммадлул ва СултIанатлул ужагъ бухху-букку чан къашайсса, цаймигу районнаясса хъамал бувхнувасса къаттая. МахIаммад Ваччав Ветеринар управлениялул хъунаману зузисса ппурттувугу вайннал ужагърай ликкайссия ялавай ва лавай наними. Хъамал хъин битаврил хъар мудангу СултIанатлул хъачIунттай дуссия. Аьпа биву, ниттия, Юнусхъал ПатIиматлуя, ирсирай дирну дия ванийн зунттал хъамитайпалул ххуй-ххуйми хасиятрал лишанну. Ванил пасихIсса ихтилатрах вичIи дишин гъирарай лагма лавгцири чан къашайссия. МаслихIат ккаккан ваничIан гъан шайссия. СултIанатгу, ниттил ххуллу бувгьуну, чIявуссаннан маслихIатчи, вихшаласса дус хьуссар.

МахIаммадлул ва СултIанатлул арсру ва душругу, миннал наслугу, ниттил ва буттал цIа гьаз дуллай, цивппа зузисса кIанттурдайгу лажин кIялашиву дуллай, шяраваллил оьрмулул иширттавухгу чялишну хIала буххайсса бур. Арсру Шамил ва ХIусайн царагу ккалли дансса даву, мероприятие лях гьан къаритайсса бур. Душ Жавгьарат Каспийскалий хIакинну зий бур, Жамилат тIимур душ –хъунмур бухгалтерну, Минажат – Социал фондрай. Душвавраву чIивимур Сарижат Ессентуки шагьрулий мина дирхьуну бур ласнащал, Аьрасатнал Силистталул комитетрай хъунама следовательну зузисса Кьурбанов Муртузлущал.

Язисса арснацIа ва душницIа хьусса кьурчIисса хажалатгу духIан багьссар СултIанатлун, кулпатрал наслулул дардгу духIан багьссар. Хъунма-хъунмур душ Дагъусттаннал КIулшиву дулаврил министерствалий экономикалул управлениялул хъунмурну зузисса Фируза, ласнащал, милицанал полковник МахIаммадрамазаннущал чил канил оьрмулуцIа бувссар. Налогирттал аралуву ххуйсса къуллугърай зузисса чIана-чIивима арс СантIу, авария хьуну, дунияллия лавгссар. Шикку кIицI къалавгун битан къахьунссар Фируза ттулва уссищар бивкIшивугу. БакIралгу, чурххалгу бювхъусса, авур­сса, дурккусса бушивруцIун, ичIаллил кушулуву гьармунил усттар­сса, яхIлувсса, хIакьсса зунттал душну къуццу тIисса бивкIшиву. Аьпа бивухъан, уссингу, нитти-буттангу, жун цинявннангу ваниха чIалачIин къадиркIшивугу. Арс СантIугу чIавасса оьрмулий гьаз хьусса, халкьуннан мюнпатранну къуццу тIисса ивкIшиву. Укун ххаллилсса душницIа, арснацIа, душнил душницIа, арснал арснацIа хьусса къюву шану бакъасса хьхьурдай кьюлтIа тIун багьссар жул ниттирссу СултIанатлун.

«Жул ниттил хъунмасса захIмат бивхьуссар жу ччаннай бацIан бан, ппу акъашиву кIул хьун къаритан. Шяраваллил медпунктрай зий бивкIссар оьрмулухун. Адаминал баймургу, хъаннил баймургу буллай, яхI-къириятрай оьрму бувтссар. Ниттил жулва цIаний бивхьусса захIмат зия къабан лайкьну оьрму бутан хIарачатрай бивкIссару жугу. Нину рязи дан дуккавриву ва давриву хьхьичIунну бикIайва уссурвал, навагу миннаяр махъун къабагьан хIарачат бувссар. Ппу дяъвилул цIараву ливчIсса жун ХIусайн тIима арснал арс МахIаммадлул СВО-лий шагьидну жан дулаврил къювугу духIлан багьунни.
Я Аллагь, жува утти циняв так ва дяъвилия гъалгъа тIий личIаннав, тай вирттал ччясса мутталий цIуллуну-сагъну, ххувшавугу ларсун, цала-цала кулпатирттачIан бучIаннав. Къабаяннав жулва оьрчIан, оьрчIал оьрчIан уттиния тинмай тачIав дяъвилул чIу, къазеххиннав оьрчIаща буттахъул!» – тIий бур СултIанат.
Жугу ванин цIакьсса цIуллушиву чIа тIий буру, ванил оьрчIал, наслулул къатлуву, гьарцаннал ужагърай барачат ва иминшиву ликканнав!
ПатIимат Рамазанова