Августрал 11-нний Дагъусттаннал бакIчи Сергей Меликовлул наградартту дуллунни ДР-лул паччахIлугърал премиярттал лауреатътуран, Расул ХIамзатовлул цIанийсса ва Сулайман Стальскийл цIанийсса премиялул лауреатътуран. Цинярдагу наградартту дуллунни миллатирттал мазурдиха, культуралуха, региондалул ляличIишивурттаха ва элмулул давурттаха зузиминнан.

Сергей Меликовлул барчаллагь увкунни премиярттан лайкь хьуминнахь цалла давриву хъунмасса захIмат бишаврихлу.
ПаччахIлугърал премияртту ларсминнавух бур «Выжившая» тIисса документал проектрал автортал.

Проектраву буслай бур Каспийскалийсса дазул къаралчитурал къатта пIякь учин баврия, Къизлардай ва Первомайскалий инсантал ширишилун бугьаврия, МахIачкъалаллал пляжрай теракт даврия, Жемикантуллал пост пIякь учин баврия, Къизлардал ахIрамравусса инсантал битлай кьатI баврия ва 1999 шинал дунияллул халкьуннал дянивсса бандитътурал кьюкьри жула республикалийн ххяххаврия. Кинораву мукунма ккаккан буллай бур цаппара хъами, кулпатирттавасса инсантал ярагъ кIунттил бувгьуну, террористътурал чулий талан лавгун бивкIшиву.

Ва кино ишла дуллай бур школалул лавайми классирттал учительтал ва вузирдал преподавательтал классрал ссятру дуллалисса чIумал.
Наградартту дуллунни республикалул личIи-личIисса районнай хIачIайсса щин ахттар дуллай бивкIсса аьлимтуран:
Малик Гъапуровлул, ванал даврил уртакьтурал АхIмад Амировлул, Заур Кьубатаевлул ва Арсен Магьдиевлул паччахIлугърал премиялул лауреатътурал дипломру лавсунни Сергей Меликовлул кIунттища.

Дагъусттаннал бакIчинал награда дуллунни Аьрасатнал Виричу АьбдулхIаким Исмяиловлуясса луттирал автор, республикалул «Елдаш» кказитрал хъунама редактор Гебек Конакбиевлун.

Сергей Меликовлул барча бунни циняв лауреатътал.
«Илчи» кказитрал редакциялул чулухату дакIнийхтуну барча буллай буру жула лакрал миллатрал вакилтал-лауреатътал: Малик Гъапуров, Заур Кьубатаев ва Арсен Магьдиев. Барачатну дугьаннав зул наградартту!