Электросетирттал тагьар цалийн дуцаврил ялувсса федерал штабрал батIаву

Августрал 12-нний ХIукуматрал къатраву хьунни Дагъусттаннал электросетирттал комплексрал тагьар цалийн дуцаврил ва муштаритал токрал дузал баврин хасъсса федерал штабрал батIаву.

Муний каялувшиву дуллай бия Аьрасатнал энергетикалул министрнал хъиривчу Петр Конюшенко ва АьФ-лул экономикалул лябуккулул министрнал хъиривчу Сергей Назаров. Ми кIиягу Дагъусттаннайн бувкIунни юрухъ аьрххилий.
БатIаврий гьуртту хьунни ДР-лул ХIукуматрал вакилтал, региондалул министерстварттал бакIчитал, профилсса идарарттал вакилтал.
Ххал бигьлай бия муштаритурал электроэнергиялухсса багьа булаврил низам ларай даврил, региондалий энергетикалул ва ЖКХ-лул идарарттал экономикалул лябуккулул программа бартдигьаврил масъалартту, закондалий дакъасса майнингращал талатаву дачин даврил хIасиллу ва цаймигу.
ДР-лул энергетикалул ва тарифирттал министр Марат Шихаьлиевлул бувсунни Дагъусттаннай муштаритурал электроэнергиялухсса багьа булаврил низам ларай даврин хасну дурсса давурттая ва ихтияр дакъанна токрацIун бавзусса ишру ашкара баврия. Министрнал тIимунийну, токрахсса багьа булаву лавайсса даражалийн диян даву мурадрай, сакин бувну бусса бур багьа булаврил низам цIакь даврил подгруппа (подгруппа по платежной дисциплине). Мунивун бувххун бур исполнитель властьрал вакилтал, ресурсоснабжениялул идарартту, региондалул Финансирттал министерство, МВД ва региондалул УФСП.
Му системалуву дуллалисса давурттайну бювхъуну бур чIалачIи дуван расчетирттал аьчухшиву ва контроль, чан дуван документру дузал баврил чIун ва чан буван миккусса гъалатIру, мукунна анавар дуккан дуван сетирдал идаралущалсса дахIаву.
«ХIакьинусса кьини республикалул бюджетравату арцу итадакьайсса идарарттал харж бувсса токрахсса багьа булаврил даража бур 93 %, миннуй бурж хьуну бур 144 млн къурушрал, дукIусса вара чIумух бурувгун 17% ххишаласса. КIанттул бюджетирттал арцу итадакьайсса идарарттал токрахсса багьа булаврил даража бур 85%, миннуй бурж хьуну бур 396,3 млн къурушрал. Ми хъанай бур, дукIусса вара чIумух бурувгун, 12% ххишаласса», – кунни Марат Шихаьлиевлул.
Строительствалул ва ЖКХ-лул министр Бахтияр Уллаевлул бувсунни Дагъусттаннай энергетикалул ва ЖКХ-лул идарарттал экономикалул лябуккулул программа бартдигьаврил хIакъираву.
Ххал бигьлагьисса масъаларттавасса ца бия муштаритуран буллусса электроэнергиялухсса бурж лахъаврицIунсса. Сергей Назаровлул бувсунни, 2025 шинал циняв коммунал хIаллихшиннахлусса багьа лахъан аьркинну бушиву 90 %
БатIаврий ххал бивгьунни Дагъусттаннал электросетирттал комплексран гъинтнил яла кIиришиву лахъмур чIумал гуж багьаврил масъалагу. Ва масъалалул хIакъираву махъ лавхъунни ДР-лул цалчинма вице-премьер Манвел Мажонцлул. Ванал тIимунийну, 2025 шинал июльданул 12-нния 31-ннийнин республикалий гьавалул тагьар хъинну зия хьуну дия, гужсса кIиришиву дагьну, мунийну электроэнергия ишла баву лапра лахъ хьуну дия ва электросетирттал комплексрайн гуж багьаву лахъ хьуну дия. Мунияту энергетикалул объектирттай технологиялул чулухасса лиявуртту гьарза хьуну дия.