Августрал 12-нний Москавлив Аьрасатнал Кубокрал 2-мур турданул тIуркIулий МахIачкъалаллал «Динамо» ххув хьунни Москавуллал «Спартакраяр».

ТIуркIулул чIумал счет хьунни 1:1. КIивагу гол бавкьунни тIуркIулул кIилчинмур бутIуй. ТIуркIулул 87-мур минутIраву Агъаларовлул жулла команда хьхьичIуннай дуккан дунни пенальтилул гол бавкьуну. «Спартакрал» жавабрансса гол бавкьунни судиянал чIун ялун ххи дурсса чIумал.
ТIуркIулия махъ хьусса пенальтирттай «Динамо» хьхьичIун дурккунни – 4:3. ЦIанасса ппурттуву Аьрасатнал Кубокрал турнирданул таблицалий цала группалуву «Динамо» цалчинсса ххуттай дур, ванил бур цIана 5 очко.