Июль зурул 26-нний Поэзиялул театрданул кIицI ларгунни 10 шинал юбилей. Театрданул коллективгу, республикалул агьалигу барча бунни культуралул министр Зарема Буттаевал, Дагъусттаннал Чичултрал союзрал каялувчи, халкьуннал шаэр Марина АхIмадова-Колюбакинал, «Зунттал хъами» журналданул хъунмур редактор Ххамис Шамиловал ва цаймигу бусравсса инсантурал.

Официал бутIа къуртал хьуну махъ, культуралул программа ккаккан дунни театрданул тIивтIу майданнив – щюллишиврувун дахьларгсса хIаятраву. Жагьилсса шаэртурал бувккунни цалва шеърирду, артистътурал увкунни балайрду, бивзунни къавтIун.
ДакIнин бутанну, Аьрасатнаву цалчинсса ва уникальныйсса театр 10 шинал хьхьичI тIивтIушиву таний Дагъусттаннал президентну ивкIсса Рамазан АьбдуллатIиповлул хIарачатрайну.

«Театрданул лагма лаган бувссар республикалул хьхьичIунми творчествалул гужру, уртакьну зий буссар Чичултрал союзращал, Театрданул зузалтрал союзращал ва цаймигу театрдал коллективрдащал, министерстварттащал, жагьилтурал ккураннащал. Ва мяйжаннугусса магьирлугърал храмраву ттуршунниха ливчусса проектру бартбивгьуссар: поэзиялул, музыкалул ва цамур журалул. Театрдал фестивальлу, конкурсру, семинарду, личIи-личIисса мероприятияртту хьуссар, агьалинал дакIру рувхIанийсса ххуйшивурттал дуцIин дуллалисса», – тIий бур Зарема Буттаева.

«Халкьуннал шаэр Расул ХIамзатовлул укунсса театр тIитIинсса хиял дузрайн буккан буван кабавкьуминнавух уссия ттул ппу, халкьуннал шаэр МахIаммад АхIмадовгу. Театрданул цалчинма худрукгу ппуя. Театр хьуссар шаэртурал цала гьунарду ккаккан бувансса, цIусса цIарду ялун личин дувансса ва культуралул чIярусса проектру бартбигьинсса кIануну. ЛичIи-личIисса миллатирттал ва пишардал инсантурал пасихIсса чIу баяйсса, мюнпатрансса, халкьуннал хIакьсса театрну», – тIий ур «Литературалул Дагъусттан» ва «ЧIавалачин» журналлал редакциярттал хъунама редактор Мурад АхIмадов. Ххи банна, хасну «Илчилул» редакциялулгу цаппара мероприятияртту дуршиву Поэзиялул театрдануву. Вайннувух – чIярусса шиннардий «Илчилул» хъунама редакторнал хъиривчуну зий ивкIсса шаэр ХIасан КIуруховлул аьпалул вечергу, лакку мазрай бюхханну шеърирду буккаврил конкурсирттай ххув хьусса оьрчIру барча буллалисса шадлугъругу.
Шиккува кIицI къалавгун къахьунссар, ва театр тIивтIуния шинай директор Елена Гьаруновал хъиривчуну зий ушиву жула лаккучу , цIанакул Лакрал чичултрал секциялий каялувшивугу дуллалисса Супиян Оьмаров.
ПатIимат Рамазанова